भैरहवा-लुम्बिनी प्रदेशका मुख्यमन्त्री चेतनारायण आचार्यले भैरहवाबाट नियमित उडानको लागि प्रदेश सरकारले पहल लिएको बताएका छन्। गौतमबुद्ध अन्तराष्ट्रिय विमानस्थल निरन्तर सञ्चालनको लागि भिसा, श्रम स्वीकृति, स्वास्थ्य परीक्षणको काम यहीबाट हुनुपर्ने भन्दै त्यसका लागि प्रदेश सरकारले निरन्तर पहल गरेको जानकारी दिए।
गौतमबुद्ध विमानस्थलको दिगो सञ्चालन, लगानी र सम्भावना विषयक छलफल कार्यक्रमलाई भैरहवामा सम्बोधन गर्दै मुख्यमन्त्री आचार्यले अन्तर्राष्ट्रिय उडानले बुटवल भैरहवामा मात्र नभइ सिंगो लुम्बिनी प्रदेशमा उत्साह जगाएको उल्लेख गरे। अब भिसा स्वीकृति, श्रम स्वीकृति र स्वास्थ्य परीक्षणको काम अघि बढाउन आग्रह गरे। अन्तर्राष्ट्रिय उडान सुरु भएपछि लगानीको थप वातावरण तयार भएको बताउँदै उनले सरकारले लगानीमैत्री कानून बनाउने जानकारी दिए। ‘मन खोलेर लगानी गर्नुस्, सरकार वातावरण बनाउन प्रतिबद्ध छ। कानून बाधक छन् भने हामी त्यसलाई संशोधन गर्न तयार छौं’उनले भने ‘व्यवसायी साथिहरुले उद्योग, व्यवसायमा लगानी गर्नुपर्छ। तर, अहिले साथीहरुले शेयर बजारमा ध्यान दिएको जस्तो लाग्छ । उद्योग, व्यवसायबाट उत्पादन र आम्दानी बढाउन सकिन्छ ।’
विमानस्थल सञ्चालनको लागि लुम्बिनी प्रदेशको सिंगो मन्त्रीमण्डल डेलिगेसन गएको स्मरण गर्दै अन्तर्राष्ट्रिय विमानस्थल सञ्चालनको लागि प्रदेश सरकारले पहलकदमी गरेको समेत सुनाए। हालसालै भएको चीनको सिचुआन प्रान्तको भ्रमणको क्रममा मुख्यमन्त्री आचार्यले सिधा हवाई उडानको बारेमा प्रस्ताव राखेका बताए। ‘भर्खर म चीन गएर आएँ । चिनको सिचुवानबाट गौतमबुद्ध अन्तर्राष्ट्रिय विमानस्थलमा पनि दैनिक उडान गराउनपर्छ भनेर मैले कुरा राखेको छु’उनले भने,‘ त्यहाँको प्रदेश सरकारले हामीले संघीय सरकारसँग कुरा गरेर अगाडि बढाउँछौं भनेर पनि भनेको छ । अन्तर्राष्ट्रिय फोरमहरुमा हामीले यो कुरा गरिरहेका छौं ।’
नेपाल चेम्बर अफ कमर्स लुम्बिनी प्रदेश र टक्सार मिडिया ग्रुप लगायतका संघ–संस्थाको संयुक्त आयोजनामा भैरहवामा गौतमबुद्ध विमानस्थलको दिगो सञ्चालन, लगानी र सम्भावना विषयमा छलफल कार्यक्रम राखिएको हो। कार्यक्रममा उद्योगी, व्यवसायीहरुले विमानस्थल चलायमान हुँदा बेग्लै आशाको सञ्चार भएको र यसलाई कायम राख्दै दिगो बनाउन जोड दिएका छन।
