काठमाडौं -बुद्धजन्मस्थल लुम्बिनीको विश्वव्यापी प्रवर्द्धनका सम्बन्धमा गैर आवासिय नेपाली संघ एनआरएनए र लुम्बिनी विकास कोषबीच छलफल भएको छ। काठमाडौंको बालुवाटार स्थित एनआरएनएको केन्द्रीय कार्यालयमा भएको छलफलमा लुम्बिनी विकास कोषका उपाध्यक्ष डा. ल्हारक्याल लामा (खेन्पो छिमे) र कोषाध्यक्ष सिद्धिचरण भट्टराई सहभागी थिए। त्यस्तै एनआरएनएको तर्फबाट उपमहासचिव तथा पर्यटन प्रवर्द्धन समिति संयोजक सोम सापकोटा र सहकोषाध्यक्ष कृष्ण तिमिल्सिनाको सहभागी थिए।
बैठकमा एनआरएनएको दृष्टिकोण र बुद्धको जन्मभूमि लुम्बिनीलाई विश्वस्तरमा प्रवर्द्धन गर्नका लागि भएका प्रयासबारे चर्चा भएको थियो। कोषका कोषाध्यक्ष डा. लामाले एनआरएनएको योगदानको प्रशंसा गर्दै यो सहकार्यलाई निरन्तरता दिनुपर्ने आवश्यकता औंल्याए। उनले एनआरएनएका सबै कार्यकारी सदस्यहरूलाई लुम्बिनीमा आयोजना हुने ब्रिफिङ सेसनमा सहभागी हुन निमन्त्रणा समेत दिए।
कोषाध्यक्ष भट्टराईले लुम्बिनीको विश्वव्यापी पहिचान बढाउन “भिजिट लुम्बिनी” अभियान सञ्चालन, एनआरएनहरूलाई लुम्बिनी भ्रमण गर्न प्रेरित गर्ने, विदेशी पर्यटक ल्याउने, र एनआरएन बालबालिकाबीच यात्रा निबन्ध प्रतियोगिता आयोजना गर्ने लगायतका सुझाव प्रस्तुत प्रस्तुत गरेका थिए। साथै, लुम्बिनीमा एनआरएन मठ वा आश्रम स्थापना गर्ने, “लुम्बिनी प्राइड” र “लुम्बिनी वर्ल्ड लाइट” पुरस्कार स्थापना गर्ने, र एनआरएन–लुम्बिनी प्रवर्द्धन समिति गठन गरी कार्यान्वयनलाई अघि बढाउने बारेमा पनि छलफल भएको थियो।
एनआरएनएका उपमहासचिव सापकोटाले बुद्ध र लुम्बिनीको प्रचार प्रसारका लागि विश्वका विभिन्न ठाउँमा गतिविधि सञ्चालन गरेको जानकारी दिए। लुम्बिनीको थप प्रभावकारी प्रचारप्रसार र प्रवद्र्धनको लागि कार्यशाला आयोजना गरि एनआरएनए र कोषले कार्ययोजना बनाएर काम गर्ने बारे छलफल भएको उनले जानकारी दिए।
जुन ठाउँमा एनआरएनएको राष्ट्रिय समन्वय समिति छ त्यहाँ नियमित रुपमा लुम्बिनीको प्रचार प्रसारका गतिविधि हुने सापकोटाले जानकारी दिए। सो अबसरमा एनआरएनएका सह–कोषाध्यक्ष श्री कृष्ण तिमिल्सिनाले आगामी दिनमा लुम्बिनीको सांस्कृतिक र आध्यात्मिक महत्वलाई थप बढावा दिन साझा प्रतिबद्धता र सकारात्मक दृष्टिकोणकासाथ सहकार्य गर्ने निर्णय भएको जानकारी दिए।
