भैरहवामा मेडिकल टेस्ट र म्यानपावरको व्यवस्था गरी श्रम स्वीकृतिलाई सहज बनाउने प्रतिबद्धता
भैरहवा- गौतम बुद्ध अन्तर्राष्ट्रिय विमानस्थलमा नियमित अन्तर्राष्ट्रिय उडान हुन थालेको एक महिना भएको छ। कात्तिक १८ गते थाइ एयर एशियाको जहाजले बैंकक भैरहवा बैंक उडान थालेको थियो। कात्तिक २३ गते जजिराले पुन उडान थालेको थियो। सोहि दिन फ्लाइ दुबइको जहाजले पनि भैरहवबाट उडान सुरु गरेको थियो।
बुधबार साँझ संस्कृति पर्यटन तथा नागरिक उड्यनमन्त्री बद्री पाण्डे, श्रम तथा रोजगारमन्त्री शरदसिंह भण्डारी र सरोकारवालाहरुबीच एक महिने उडानको समिक्षा गरिएको थियो। छलफलमा सिधा र लो–कस्ट एयरलाइन्स, त्यसमा पनि श्रम गन्तव्य धेरैको छनोट रहेको पाइएको निकर्ष निकालिएको थियो।
कार्यक्रममा पर्यटनमन्त्री बद्री पाण्डेले भैरहवाबाट अन्तर्राष्ट्रिय उडानमा देखिएका समस्याहरु सबै पहिचान भइसकेको भन्दै त्यसलाई आधार मानेर समस्या समाधान गर्दै जाने बताए। उनले गौतम बुद्ध अन्तर्राष्ट्रिय विमानस्थलको दिगो सञ्चालनमा सरकारले कुनै कसर नराख्ने प्रतिबद्धता व्यक्त गरे। श्रम तथा रोजगार मन्त्री शरदसिंह भण्डारीले भैरहवाबाट अन्तर्राष्ट्रिय उडानको क्रममा सिधा र लो–कस्ट एयरलाइन्स, त्यसमा पनि श्रम गन्तव्य धेरैको छनोट रहेको पाइएको त्यही अनुसार मार्केटिङ र विजनेस अनुकूल रणनीति बनाइने उल्लेख गरे। यस सम्बन्धमा मन्त्रालयका तर्फबाट गर्नुपर्ने काम अघि बढाउने जानकारी दिए।
कार्यक्रममा यात्रुहरुको लागि सहज रूपमा मेडिकल टेस्ट र म्यानपावरको व्यवस्था गरी श्रम स्वीकृतिलाई सहज बनाउने प्रतिबद्धता व्यक्त गरिएको थियो। श्रम सचिव मुकुन्द प्रसाद निरौलाले मन्त्रीपरिषदबाट भएका निर्णय कार्यान्वयन गर्ने सन्दर्भमा कानुनी व्यवस्थामा गर्नु पर्ने परिमार्जन लगायतका प्रकृया समेत अघि बढेको जानकारी दिए।
गौतमबुद्ध अन्तर्राष्ट्रिय विमानस्थलका महाप्रबन्धक प्रताप बाबु तिवारीले काठमाडौंसँग जोडेर उडान गर्ने जहाजमा भन्दा सिधा उडान गर्ने जहाजले धेरै यात्रु पाएको तथ्यांक प्रस्तुत गरे। श्रम गन्तव्यमा उडान गर्ने यात्रु उलेख्निय रहेको उनले जानकारी दिए।
एक महिनाको अवधिमा फ्लाईदुबईले सबैभन्दा धेरै उडान गरेको र जजीरा एयर मार्फत सबैभन्दा धेरैले यात्रा गरेको महाप्रबन्धक तिवारीले बताए।
नोभेम्बर ३ देखि डिसेम्बर ३ सम्म गौतम बुद्ध अन्तर्राष्ट्रिय विमानस्थलबाट कुल १५६ अन्तर्राष्ट्रिय उडान र अवतरण भएका छन्। जसमा ४ हजार ७७१ जनाले यात्रा गरेका छन्। २ हजार ५३३ यात्रु भैरहवा झरेका छन्। २ हजार २३८ जना भैरहवाबाट प्रस्थान गरेको गौतम बुद्ध अन्तर्राष्ट्रिय विमानस्थलले जनाएको छ।
कुवेतको जजिरा एयरवेजले भैरहवामा २२ वटा उडान र अवतरण गरेको छ। जसमा ३ हजार ३४ जना जनाले यात्रा गरेका छन्।
फ्लाई दुबइले भैरहवा भएर ४६ वटा उडान र अवतरण गर्दा १ हजार १३४ यात्रुले सेवा लिएका छन्। कतार एयरवेजको ३८ उडानमा ९३ जना भैरहवा अवतरण गरेका छन्। थाइ एयर एशियाका १० उडानमा ४४७ जनाले यात्रा गरेका छन्। नेपाल एयरलाइन्सले २४ उडान गर्दा ३९ जनाले भैरहवाबाट प्रस्थान गरेका छन्।
कार्यक्रममा सहभागी व्यवसायी सरोकारवालाहरुले नेपाल सरकारबाट भएका निर्णय कार्यान्वयन र दिगो सञ्चालनमा जोड दिँदै भैरहवाबाट सिधा उडानलाई प्राथमिकता दिनु पर्ने उल्लेख गरे। उनीहरुले न्यून भिजीबिलिटीमा अवतरणको विकल्प प्रणालीको अवलम्बन गर्नुपर्ने बताएका थिए।
