पर्यटनमा नयाँ नीतिका साथ प्रदेश सरकार अघि बढ्छ : मन्त्री ढकाल
भैरहवा -नेपाल एशोसिएशन अफ टुर एण्ड ट्राभल एजेण्ट्स (नाट्टा) लुम्बिनीको नवनिर्वाचित कार्यसमितिको पदस्थापन भएको छ। मंसिर १ गते भएको अधिवेसनले चन्द्र थापाको अध्यक्षतामा नयाँ कार्यसमिति चयन गरेको थियो।
निर्वाचन समितिका संयोजक युवराज कंडेलले नवनिर्वाचित अध्यक्ष, पदाधिकारी र सदस्यहरुलाई सपथ ग्रहण गराउँदै प्रमाणपत्र प्रदान गरेका थिए। अधिवेसनबाट प्रथम उपाध्यक्षमा कुलचन्द्र पाण्डे, द्वितीय उपाध्यक्षमा लक्की सिंह र तृतीय उपाध्यक्षमा अन्जन श्रेष्ठ, महासचिवमा सीता बसेल, सचिवमा अंकित जैसवाल, कोषाध्यक्षमा प्रदिप कुमार पोखरेल चयन भएका थिए । सदस्यहरुमा टंक काफ्ले, विराट श्रेष्ठ, बरुण ज्ञवाली, हरि पौडेल, भुवन पाण्डे, गणेश भट्टराई, मित्रशरण शर्मा, प्रदिप कुमार उदय निर्वाचित भएका थिए।
पदस्थापन समारोहमा लुम्बिनी प्रदेशका भौतिक पूर्वाधार विकासमन्त्री भूमिश्वर ढकालले पर्यटनमा नयाँ नीतिका साथ प्रदेश सरकार अघि बढ्ने बताए। प्रदेशको आर्थिक क्षेत्रको प्रमुख माध्यम पर्यटन भएको भन्दै यसलाई अघि बढाउन नीजि क्षेत्र लाग्नुपर्ने उल्लेख गरे। ढकालले प्रदेशका विभन्न गन्तव्यलाई समेटेर प्याकेज ल्याउन नाट्टालाई सुझाब दिए।
पर्यटन विकास परिषद लुम्बिनीका कार्यकारी निर्देशक रामु जोशीले प्रदेशको पर्यटकीय विकासको लागि नाट्टासँग सहकार्य गरेर अघि बढ्ने बताए। परिषदले टुर प्याकेजदेखी नीति नियमका बारेमा निजी क्षेत्रसँग निरन्तर छलफल गर्ने उनले जानकारी दिए।
बुटवल उपमहानगरपालिकाका उपमेयर गुमादेवी आचार्यले प्रदेश र स्थानीय सरकार मिलेर पर्यटन क्षेत्रको विकासमा लाग्नुपर्ने उल्लेख गरिन्। नाट्टा लुम्बिनीकी निवर्तमान अध्यक्ष रचना पन्तले आफ्नो कार्यकालमा शालिग्रामको प्रवद्र्धन, रानीमहल ब्राण्डी, आरती कार्यक्रम, ट्रेकिङ हाइकिङ जस्ता कार्यक्रम आयोजना गरिएको बताइन्।
कार्यक्रममा पर्यटन डिभिजन कार्यालय रुपन्देहीका प्रमुख नेत्र भुसाल, सिद्धार्थ उद्योग वाणिज्य संघ, रुपन्देहीका अध्यक्ष ठाकुर कुमार श्रेष्ठ, नाट्टा लुम्बिनीका पूर्वअध्यक्ष कृष्ण प्रसाद अधिकारी (सागर), होटल महासंघ नेपालका केन्द्रीय महासचिव राजेश महोत्रा, होटल एशोसियनका केन्द्रीय सदस्य चन्द्रप्रकाश श्रेष्ठ, चेम्बर अफ कमर्स रुपन्देहीका अध्यक्ष दर्पण श्रेष्ठ, सिद्धार्थ सञ्जाल रुपन्देहीका अध्यक्ष अनिल कुमार ज्ञवाली, होटल तथा रेष्टुरेण्ट व्यवसायी संगठन रुपन्देहीका अध्यक्ष राम प्रसाद पोखरेल लगायतले भनाइ राखेका थिए ।