मेला मार्फत बुटवल र आसपासका गन्तव्य घुम्न टुर प्याकेज

बुटवल– हामी मध्ये कतिपय मुस्ताङ, राराताल, इलाम जाँदा घोडा चढेर रमाइलो गर्छौं। तर अहिले बुटवलमै पनि घोडा चढेर रमाउन सकिन्छ। बुटवलमा जारी औद्योगिक व्यापार मेलामा घोंडा चढेर केहीबेर घुम्न पाइन्छ। बुटवल उद्योग बाणिज्य संघको आयोजनामा पुस ३ गतेबाट बुटवल मण्डपमा मेला सुरु भएको छ। संघको टुर एण्ड ट्राभल बस्तुगत समितिले घोडचढी सहित विभिन्न पर्यटकीय सेवा प्रदान गर्दै छ।

मेलाको लागि टिकट काटेर गेटबाट प्रवेश गर्ने वित्तीकै बायाँ साइडमा घोडचढीको स्टल रहेको छ। जहाँ रथ र घोंडा राखिएको छ। सय रुपैयाको टिकट काटेपछि बुटवल मण्डप परिसरको केही ठाउँ घुम्न सकिने बुटवल उद्योग बाणिज्य संघ अन्तर्गत टुर एण्ड ट्राभल बस्तुगत समितिका सभापति अन्जन श्रेष्ठले बताए। ‘मेलामा पर्यटन सम्बन्धी केही गतिविधि गरौं। मेला अवलोकन गर्न आउनेलाई थप रामाइलो प्रदान गर्न घोडचढी कार्यक्रम राखेका हौं।’ उनले भने ‘घोडामा चढाएर यो परिसर घुमाएर यही ल्याएर छोडदिन्छौं। घोडचढि स्टलमा बग्गी पनि राखिएको छ।’ स्टलमा आउनेले बग्गीमा चढेर फोटो खिचेर रमाइलो गर्न पाउन भन्ने उदेश्यले सेल्फी जोनको रुपमा बग्गी राखेको श्रेष्ठले बताए।

टुर एण्ड ट्राभल बस्तुगत समितिका उपसभापति बरुण ज्ञवालीले पछिल्लो समय घोडचडी प्रति आकर्षण बढ्दै गएकाले मेलामा पनि यो कार्यक्रम राखेको बताए। ‘मुस्ताङ, राराताल लगायतका ठाउँमा घोडा चढेर फोटो भिडियो सामाजिक सञ्जालमा देख्छौं।’ उनले भने ‘मेलामा पनि हामीले त्यो खालको मनोरञ्जन दिने प्रयास गरेका हौं।’

टुर एण्ड ट्राभल बस्तुगत समितिले औद्योगिक व्यापार मेला मार्फत बुटवल र आसपासका स्थान घुम्न प्याकेज पनि ल्याएको छ। बस्तुगत समितिका सभापति श्रेष्ठले हजार रुपैयाको प्याकेजमा मेलाको अवलोकनसँगै केबलकार चढ्न सकिने बताए। प्याकेजमा मेलाको अवलोकन, सिद्धार्थ केबलकारबाट नुवाकोटको यात्रा, लन्चको सुविधा रहेको उनले जानकारी दिए। त्यस्तै बुटवलका विभिन्न पर्यटकीय स्थल घुम्नको लागि पनि सहज व्यवस्था गर्ने बस्तुगत समितिले जनाएको छ। समूहमा बुटवलका विभिन्न ठाउँ घुम्न आउनेहरुको लागि पनि सहुलियत दरको प्याकेजको व्यवस्था गर्ने श्रेष्ठले बताए।