पोखरा-पोखरामा ‘अन्तर्राष्ट्रिय हट एयर बेलुन महोत्सव २०२४’ सुरु भएको छ। बेलुन नेपाल प्रालि र पोखरा पर्यटन परिषद्को संयुक्त आयोजना एवं पोखरा महानगरपालिकाको प्रवर्द्धनमा महोत्सवको आयोजना भएको हो। महोत्सव नयाँ वर्ष २०२५ को पहिलो दिनसम्म चल्नेछ। बेलुन महोत्सवको गण्डकी प्रदेशका मुख्यमन्त्री सुरेन्द्रराज पाण्डेयले उद्घाटन गरे।
महोत्सवमा नेपालसहित स्पेन, फ्रान्स, लिथुवानिया, मलेसिया, जापान, अस्ट्रेलिया, अमेरिका, अस्ट्रिया, कोरिया, इटली, युके, लाओस, जर्मनी, भारत, दुबई, नेदरल्यान्ड, थाइल्यान्ड, बेल्जियमलगायत देशका हट एयर पाइलटहरूले बेलुन उडाइरहेका छन्। पछिल्लो समय पोखराको पर्यटनमा नयाँ आयामका रूपमा एयर बेलुन स्थापित हुँदै गइरहेको छ।
पोखरा २३ र २४ मा पर्ने फेवा फाँअन्तर्गतको लौरुकदेखि चंखपुरसम्मको तीन किलोमिटर क्षेत्रमा हट एयर बेलुनको उडान हुनेछ। महोत्सव अवधिभर दैनिक बिहान र साँझ गरी पोखराको आकाशमा १७ वटा आकर्षक बेलुनहरू उड्नेछन्।
