बुटवल-बुटवलमा जारी औद्योगिक व्यापार मेलामा केबलकारको टिकटमा छुट सुविधा उपलब्ध गराइएको छ। मेलाको टिकट लिएर जानेलाई लुम्बिनी केवल कारमा २५० रुपैयां छुट दिएको छ।

मेला अवलोकन गर्न लिएको टिकट सुरक्षित राखेर केबलकार चढ्न चाहेमा ७ सय ५० रुपैयां दरको टिकट पांच सय रुपैयांमा पाइने गरी मेला आयोजक बुटवल उद्योग वाणिज्य संघ र लुम्बिनी केबलकार लि। बीच सम्झौता भइसकेको छ। मेला अवलोकन गर्न सर्वसाधारणका लागि ७० रुपैंया र विद्यार्थीका लागि ५० रुपैयाँ टिकट शुल्क निर्धारण गरिएको छ।

मेलाको टिकट लिएर आउनेलाई मेला अवधि पुस १८ सम्म मात्र नभई पुस मसान्तसम्म छुट दिइने सम्झौता भएको केबलकारका अप्रेसन म्यानेजर डिएन कायस्थ सैजूले जानकारी दिए। कम्पनीले आन्तरिक र वाह्य पर्यटकलाई विभिन्न अवसरमा टिकट दरमा छुट दिने नीति अनुसार बुटवलको औद्योगिक ब्यापार मेलाका दर्शकलाई पनि सहुलियत दिन यो अफर ल्याइएको उनले बताए।

समुद्री सतहबाट करिब एक हजार मिटर उचाइमा रहेको केबलकारको टप स्टेशन बसन्तपुरमा तराईका ठाउँभन्दा ७ देखि १० डिग्री सेल्सियस कम तापक्रम हुने भएकाले पर्यटकको लागि रोजाईको केन्द्र बन्न पुगेको छ। केबलकारले औद्योगिक ब्यापार मेलामा पनि स्टल राखेको छ। मेलामा राखिएको स्टलबाट पनि केबलकारको टिकट लिन सकिने कम्पनीले जनाएको छ।
पुस ३ गतेदेखि १८ गतेसम्म सञ्चालन हुने मेलामा ५ लाख भन्दा बढी दर्शकले अवलोकन गर्ने आयोजकको अपेक्षा छ। दुई संस्थाबीचको सहमतिले महोत्सव अवलोकन गर्ने दर्शक केबलकार चढ्न चाहेमा सहुलियत भई लाभान्वित हुने संघका अध्यक्ष हरिप्रसाद अर्यालले बताए।