बुटवल -प्राणीशास्त्र सम्बन्धी राष्ट्रिय सम्मेलन पाल्पाको बसन्तपुरमा सुरु भएको छ। प्राणी शास्त्र केन्द्रीय विभाग र नेपाल जोलोजिकल सोसाइटीको संयुक्त आयोजनामा नेश्नल कंग्रेस अफ जोलोजि सुरु भएको हो। सम्मेलनको उद्घाटन गदै लुम्बिनीका मुख्यमन्त्री चेतनारायण आचार्यले वातावरणी सन्तुलन कायम राख्न प्रदेश सरकारले हरेक क्षेत्रबाट सहकार्य गर्ने बताए।
उनले पारिस्थितिक प्रणालीलाई सन्तुलनमा राख्न हरेक क्षेत्रबाट सहकार्य हुने उल्लेख गरे। ‘वातावरणीय सन्तुलन जरुरी छ। पारिस्थितिक प्रणालीलाइ जोगाउन छ। यसका लागि लुम्बिनी प्रदेशमा यहाँहरुले गर्ने खोज अनुसन्धानबाट प्राप्त नतिजालाई आधार मानेर सरकारले आफ्ना नीति, कार्यक्रम बनाउँछ।’ आचार्यले भने, ‘लुम्बिनी प्रदेश जैविक विविधताले धनी छ। यसलाई बचाइराख्न जरुरी छ । मानिस जीवनको अस्तित्व जोगाउन पनि पारिस्थितिक प्रणाली संरक्षण गर्न जरुरी छ।’ विकास र समृद्धिको आधारको रुपमा वातावरणीय क्षेत्र रहेको, यसको संरक्षण र मितव्ययि सदुपयोगबाट दिगो विकासको आधार निर्माण गर्न सकिने मुख्यमन्त्रीको भनाइ छ।
कार्यक्रममा प्राज्ञिक, वैज्ञानिक, अनुसन्धानकर्ता र विद्यार्थीहरुस्लाई प्राणी विज्ञानको सबै पक्षमा अनुसन्धानको निश्कर्ष प्रस्तुत गरिएको नेपाल जोलोजिकल सोसाइटिका अध्यक्ष प्राध्यापक प्रा.डा. महेन्द्र महर्जनले बताए। सम्मेलनमा जैविक विविधता र पारिस्थितीक प्रणाली, मानव बन्यजन्तु द्वन्द र न्युनिकरण लगायतका विषयमा छलफल भइरहेको छ। सम्मेलनमा देशभरबाट १५० भन्दा बढि प्राणीशास्त्रीहरुको सहभागीता रहने नेपाल जोलोजिकल सोसाइटी लुम्बिनी प्रदशेका अध्यक्ष बाबुराम बन्जाडेले जानकारी दिए।
प्राणीशास्त्री र अनुसन्धानकर्ताहरु लुम्बिनी केबलकारको यात्रा मार्फत माथिल्लो स्टेशन बसन्तपुरमा सम्मेलन गरी प्रख्यात शक्ति पीठ कामाख्या मन्दिर दर्शन समेत गरेका छन्। सम्मेलन अन्तर्गत पुस १६ गते प्राणीशास्त्री र अनुसन्धानकर्ताहरुलाई लुम्बिनीको दृष्यावलोनको व्यवस्था समेत गरिएको छ।
