लुम्बिनीका पर्यटनमन्त्री भन्छन्ः अन्तर्राष्ट्रिय उडानको निरन्तरताका लागि प्रदेश सरकारले जस्तो सुकै पहल गर्छ

भैरहवा -नेपाल नागरिक उड्यन प्राधिकरणले मंगलबार आफ्नो २६ औं बार्षिकोत्सव मनाएको छ। बार्षिकोत्सवको अवसरमा प्राधिकरण अन्तर्गत गौतमबुद्ध अन्तर्राष्ट्रिय विमास्थलले पनि बार्षिकोत्सव समारोह गरेको थियो। केही हप्ता अघि भैरहवाको विमानस्थलमा फरक उत्साह देखिन्थ्यो।

कात्र्तिकको तेस्रो साताबाट भैरवामा ५ वटा विमान कम्पनीहरुले अन्तर्राष्ट्रिय उडान थालेको थिए। ति उडानले निरन्तरता पाएको भए। वार्षिकोत्सव समारोह विशेष हुने थियो। अन्तर्राष्ट्रिय उडान रोकिएको अवस्थामा भएको बार्षिकोत्सव समारोहमा चिन्ता र निराशा व्यक्त भएको थियो। नेपाल चेम्बर अफ कमर्शका लुम्बिनी प्रदेश अध्यक्ष टंक पोखरेलले आफूहरु खुशीपछि फेरी दुखी भएको सुनाए। ‘अन्तर्राष्ट्रिय विमानस्थल सञ्चालनमा आयो भनेर खुशी भयौं निरन्तर चलेन फेरी दुखी हुनुपर्यो।’ उनले भने ‘सजिलै यो एयरपोर्ट चल्दैन हामीले अलिकती तागत लगाउनुपर्छ भन्ने आभास भएको छ।’ भैरहवालाई श्रमिक र पर्यटन गन्तव्यसँग जोडेर विमानस्थल चलाउनुपर्ने पोखरेलको भनाइ छ।

नेपाल उद्योग बाणिज्य संघका लुम्बिनी प्रदेश अध्यक्ष कृष्णप्रसाद शर्माले विमानस्थलमा पूर्ण रुपमा प्राविधीक संयन्त्र जडान हुनुपर्ने र म्यान पावर कम्पनी आए मात्र अन्तर्राष्ट्रिय उडान निरन्तर हुने बताए। ‘श्रम स्वीकृती यहाँबाट भयो र म्यानपावर कम्पनीले यहाँ कम्तीमा २ सय वटा सटर लिए भने यहाँ चलायमान हुन्थ्यो।’ उनले भने ‘विमानस्थललाई देखेर नीजि क्षेत्रको ८० अर्ब लगानी भएको छ। विमानस्थल चलेन भने धान्न गाह्रो हुन्छ।’ सिद्धार्थनगर नगरपालिकाका मेयर इस्तियाक अहमद खाँले गौतम बुद्ध विमानस्थल जसरी पनि चल्नुपर्ने उल्लेख गरे।

व्यवसायी र सरोकारवालाहरुको कुरा सुनेपछि लुम्बिनी प्रदेशका उद्योग पर्यटन तथा यातायात मन्त्री प्रचण्ड विक्रम न्यौपानेले भैरहवाबाट अन्तर्राष्ट्रिय उडानको निरन्तरताको लागि प्रदेश सरकारले जस्तो सुकै पहल गर्ने बताए। ‘निजी क्षेत्रले उडान भएन मात्र भन्ने होइन। हामी सबै लाग्ने हो। म कहाँ डेलिगेसन जानुपर्ने हो भन्नुस।’ उनले भने ‘यहाँ जाहाज बसाल्ने काम नेपाल सरकारले लिनुपर्छ। प्रदेशको पर्यटन मन्त्रीको काम पर्यटकलाई ल्याउने र प्रचार गर्ने बाहेक केही छैन। हामीलाई दिन पर्ने अधिकार दिइएको छैन।’

गौतमबुद्ध अन्तर्राष्ट्रिय विमानस्थलका महाप्रबन्धक प्रतापबाबु तिवारीले अहिले मौसमको कारण देखाएर केही विमान कम्पनीले उडान स्थगित गरेको बताए। उनले कम भिजिविलिटीमा उडान हुन सक्ने गरि आरएनपी एआर विधिको तयारी भइरहेको जानकारी दिए। ‘भु उपग्रहमा आधारित आरएनपी एआर एप्रोज अवतरण विधि प्रकाशन भइ जनवरी २३ देखी लागू हुँदैछ।’ तिवारीले भने। फ्लाई दुबईले जनवरी १३ र जजिराले जनवरी ३१ बट पुन उडान सुचारु गर्ने जानकारी प्राप्त भएको उनले बताए।