काठमाडौं-सन २०२४ मा पर्यटक आगमनमा उत्साहजनक बृद्धि देखिएको छ। यो वर्ष ११ लाख ४७ हजार ५६७ पर्यटक नेपाल भित्रिएका छन्। अघिल्लो वर्ष सन २०२३ को तुलनामा पर्यटक आगमन गत वर्ष १३.१ प्रतिसतले बृद्धि भएको अध्यागमन विभागलाई उध्रित गर्दै नेपाल पर्यटन बोर्डले जनाएको छ।
सन २०२४ मा सबै भन्दा बढि भारतबाट ३ लाख १७ हजार ७७२ पर्यटक नेपाल आएका छन्। अमेरिककाबाट १ लाख ११ हजार २१६, चिनबाट ५७ हजार ५५४ पर्यटक आएको बोर्डका निर्देशक तथा सूचना अधिकारी मणिराज लामिछानेले जानकारी दिए। त्यस्तै संयुक्त अधिराज्यबाट ४८ हजार ८४८, बंगालादेशबाट ४३ हजार ९८०, अष्ट्रेलियाबाट ३० हजार ७४५ र थाइल्याण्डबाट ३० हजार २२६ पर्यटक आएको बोर्डले जनाएको छ।
नेपाल पर्यटन बोर्डका प्रमुख कार्यकारी अधिकृत दीपकराज जोशीले सामूहिक प्रयासको तालमेल र सुरुदेखि नै बढाइएको साझेदारीको भावनाले अन्तर्राष्ट्रिय पर्यटक आगमनमा उल्लेखनीय वृद्धि सम्भव भएको बताए। कोरोना अघिको पर्यटक आगमनमा ९६% पुनःप्राप्ति हासिल गरेको उल्लेख गरे।
पर्यटक आगमनमा भएको वृद्धिले प्रमाणित गर्दै सबैभन्दा मनपर्ने पर्यटकीय गन्तव्यहरू मध्ये एकको रूपमा नेपालको छवि अझ बलियो भएको बताए। यो उपलब्धिले नेपाल सरकार, नेपाल पर्यटन बोर्ड, यात्रा व्यापार क्षेत्र र मिडियाको विश्वव्यापी पर्यटन मञ्चमा नेपाललाई प्रवद्र्धन गर्ने संयुक्त प्रयासलाई प्रतिबिम्बित गर्ने उनको भनाइ छ।
