बुटवल – एयर एशियाले ‘नयाँ रुट लुम्बिनीबाट बैंकक’ भनेर आफ्नो वेवसाइट तथा सामाजिक सञ्जालहरुमा प्रचार प्रसार थालेको छ। प्रचार प्रसार मार्फत १२ हजार ९९० रुपैयामै लुम्बिनीबाट बैंककको यात्रा गर्न सकिने उसले बताएको छ। थाइ एयर एसियाको जहाज मार्फत आउँदो फेबुररी ३ तारिबाट यो भाडादरमा एकतर्फी उडान गर्न सकिने वेवसाइटमा उल्लेख छ। त्यसको लागि जनवरी २६ सम्म बुकिङ अवधि रहेको बताइएको छ।
तर एयर एसियाको वेवसाइटमा रहेको बुकिङ सिष्टममा भने सो भाडादर अझै देखाइएको छैन। मंगलबार दिउसो देखाइए अनुसार फेबुररी ३ को लागि बैंकक भैरहवाको भाडादर १६ हजार ६०० रुपैया छ। सोही दिन भैरहवा लुम्बिनीको भाडादर २७ हजार देखाइएको छ। नाट्टा लुम्बिनीका अध्यक्ष चन्द्र थापाले १२ हजार ९९० रुपैया सिमित कोटाको लागि राखेको हुन सक्ने बताए। ‘प्रचार त मैले पनि हेरिरहेको छु। अहिले त्यो अनुसार छैन। सिमित सिटको लागि होला।’ उनले भने ‘तोकिए अनुसार पछि घटाउन सक्ला।’ ट्राभलहरुले अहिले १७ हजार रुपैयामा टिकट काट्न सक्ने थापाले बताए।
थाइ एयर एशियाले गत कात्र्तिक १८ गतेबाट बैंकक भैरहवा बैंकक उडान थालेको थियो। हप्तामा २ दिन उडान अनुमती लिएको थियो। सुरुमा दुई वटै उडान गरेपछि पछि सातामा एक उडान गरेको थियो। यो बीचमा मौसमका कारण उसले उडान रोकेको छ। यस अघि उडान गरेको भएपनि थाइ एयर एसियाले वेवसाइटको टिकट सिष्टममा भैरहवा सेक्टर देखाएको थिएन। अहिले भने भैरहवा सेक्टर राखेर नयाँ रुट भन्दै प्रचार प्रसार गरेको हो।
नाट्टा लुम्बिनीका अध्यक्ष चन्द्र थापाले वेवसाइट र सामाजिक सञ्जालमा प्रचार प्रसार गर्नु उडानको निरन्तरताको संकेत भएको बताए। ‘यसरी प्रचार प्रसार गरेपछि। थाइल्याण्ड-भैरहवाको उडानले निरन्तरता पाउँछ भन्ने आशा गरेका छौं।’ उनले भने ‘निरन्तरता पायो भने बौद्धिष्ट मुलुकबाट भैरहवाको लागि अरु उडानहरु पनि थपिन सक्छ।’
