तिलोत्तमा -गैरआवासीय नेपाली संघ एनआरएनएले रुपन्देहीको तिलोत्तमा नगरपालिकाको पर्यटन प्रवर्द्धनमा सहकार्य गर्ने भएको छ। तिलोत्तमा नगरपालिकाका प्रमुख रामकृष्ण खाण, प्रमुख प्रशासकिय अधिकृत नारायण अर्याल र एनआरएनएका उपमहासचिव तथा पर्यटन प्रवद्र्धन समितिका संयोजक सोम सापकोटाबीच पर्यटन प्रवद्र्धन र लगानीका सम्भावना बारे छलफल भएको थियो।
छलफलमा तिलोत्तमा नगरपालिकाका प्रमुख रामकृष्ण खाणले विभिन्न सुचकमा आफ्नो नगर नेपालकै उत्कृष्ठ पालिकाको रुपमा रहेको बताए। उनले तिलोत्तमामा पर्याप्त सम्भावना भएको भन्दै लगानी गर्न एनआरएनएसँग आग्रह गरे। तिलोत्तमाले भिजिट लुम्बिनी र स्टे तिलोत्तमाको नारा सहित पर्यटन क्षेत्रमा अघि बढेको खाणले जानकारी गराए।
एनआरएनएका उपमहासचिव सापकोटाले मुलुक बाहिर भएका तिलोत्तमाबासीले नगरको विकास र पर्यटन प्रवद्र्धनमा भूमिका खेल्न सक्ने उल्लेख गरे। त्यसमा एनआरएनएले समन्वय र सहकार्य गर्ने उनले जानकारी दिए। निकट भविश्यमै तिलोत्तमाबाट बाहिर गएका प्रवासीहरुको सम्मेलन गर्ने, पर्यटन प्रवद्र्धन र लगानीको लागि आवहान गर्ने बारेमा छलफल भएको सापकोटाले जानकारी दिए।
यस्तै एनआरएनएका उपमहासचिव तथा पर्यटन समिति संयोजक सोम सापकोटाले देवदह, रामग्राम, लुम्बिनी सांस्कृतिक र कपिलबस्तु नगरपालिकामा भ्रमण गरि त्यहाँका नगरप्रमुख र प्रशासकिय अधिकृतहरुसँग छलफल गरेका छन्। छलफलमा पर्यटन प्रवद्र्धन र सहकार्य सम्बन्धमा कुराकानी भएको लुम्बिनी सांस्कृतिक नगरपालिकाका समन्वय प्रमुख तुल्सीराम लामिछानेले जानकारी दिए। यस अघि बुद्ध स्थलका चार नगरपालिका र एनआरएनएबीच पर्यटन विकास तथा प्रवद्र्धनको लागि एमओयु भएको थियो।
