काठमाडौं– तेन्जिङ नोर्गे शेर्पा ओपन क्लाइमिङ कम्पिटिशन (खुल्ला आरोहण प्रतियोगिता)को दोस्रो संस्करण काठमाडौँमा सुरु भएको छ। प्रतियोगिता आज बुधबार जगडोलस्थित गेटवे एड्भेन्चर हबमा सुरु भएको हो।

प्रतियोगिताको उद्घाटन गर्दै गोकर्णेश्वर नगरपालिकाका मेयर दिपक कुमार रिसालले तेन्जिङ नोर्गे शेर्पाको नाम लिन पाउँदा आफूलाई एक्दमै खुशी लागेको सुनाए। ‘नेपालमा यस्ता कार्यक्रमलाई मैले महत्वपूर्ण ठानेको छु। नेपाललाई माउन्टेन कन्ट्री भनेर चिन्छन्। त्यसकारण हामी नै यसमा मलाई इन्ट्रेस्ट छ।’ उनले भने। ‘हाम्रो नगरपालिकास्थित शहिद पार्कमा आरोहण सम्बन्धित क्लाइमिङ वाल बनाउन चाहेमा नगरपालिकाको पनि साथ रहन्छ।’

यूएस नेपाल क्लाइम्बर एशोसिएसन र नेपाल नेशनल माउण्टेन गाइड एशोसिएसनको संयुक्त आयोजनामा सुरु भएको उक्त प्रतियोगिताको लागि जनवरी १५ देखि २५ तारिखसम्म आवेदन खुल्ला गरिएको थियो। जसमा ५० भन्दा बढीले सहभागिता जनाएका छन्। प्रतियोगिता यही आज माघ १६ र १७ गरि २ दिन सञ्चालन हुने यूएस नेपाल क्लाइम्बर एशोसिएसनका संस्थापक अध्यक्ष एवं प्रतिनिधि सेराप जाङ्बु शेर्पाले जानकारी दिए।

प्रतियोगितामा नियामानुसार १२ वर्षभन्दा माथिकाले सहभागीता जनाएका छन्। पुरुष र महिलाबीच छुट्टाछुट्टै प्रतिस्पर्धा गराइएको छ। प्रतियोगितामा पहिलो, दोस्रो र तेस्रो स्थान हासिल गर्ने महिलारपुरुषले क्रमशः ४५ हजार, ३० हजार र १५ हजार नगद पुरस्कार प्राप्त गर्ने छन्।

प्रतियोगिताको टाइटल स्पोन्सरस् हेली एभरेस्ट, ग्रोल्ड‌ स्पोन्सरस् सेभेन समिट ट्रेक, सिल्भर स्पोन्सर हिमालयन गाइड्स नेपाल ट्रेक्स एण्ड एक्सपेडिसन, एभरेस्ट शेर्पा फाउन्डेसन, ब्रन्ज स्पोन्सरस् आम डब्लम बेस क्याम्प लज रहेका छन्।