लुम्बिनी -सन २०२५ को पहिलो महिना १ लाख ६६ हजार ९६६ जनाले बुद्ध जन्मस्थल लुम्बिनीको भ्रमण गरेका छन्। जसमा १ लाख २९ हजार ७१० नेपाल भित्रकै पर्यटक हुन्। अघिल्लो वर्ष २०२४ को जनवरीमा ५५ हजार १२८ जना आन्तरिक पर्यटक लुम्बिनी आएका हुन्। यो वर्ष दोब्बर भन्दा बढि देखिएको छ।

यो वर्षको पहिलो महिना २५ हजार २५६ भारतीय पर्यटक लुम्बिनी आएका छन्। अघिल्लो वर्ष २०२४ को यही अवधिमा १८ हजार ३३४ भारतीय आएका थिए। भारतीय पर्यटकको संख्या केही बढेको देखिन्छ।

जनवरीलाई आधार मान्दा तेस्रो मुलुकका पर्यटक केही घटेका छन्। यो वर्ष जनवरीमा ८ हजार ६०५ राहदानीवाहक पर्यटक लुम्बिनी आएका छन्। २०२४ को सोही अवधिमा ९ हजार ६१० जना विदेशी पर्यटक लुम्बिनी आएका थिए। तेस्रो मुलुकका पर्यटक मध्ये सबै भन्दा बढि थाइल्याण्डका २ हजार ७२० जना आएका छन्। दक्षिण कोरियाबाट १ हजार २५६, भुटानबाट ९७०, चिनबाट ९३३, म्यमानमारबाट ८८२ जना लुम्बिनी आएका छन्।