भैरहवा-केही दिन अघि भैरहवाबाट अन्तर्राष्ट्रिय उडान गर्ने विदेशी एयरलाइन्सका प्रतिनिधि र यस क्षेत्रका ट्राभल व्यवसायीबीच छलफल भएको थियो। सिद्धार्थ भिलासामा एयरलाइन्सको तर्फबाट आयोजित छलफलमा युएईको ईमिरेट्स एयरलाइन्स नेपालका जनरल मेनेजर रमेश लामिछाने, फ्लाई दुवईका जनरल म्यानेजर नवराज शाही, थाई एयर एशियाका म्यानेजर सागर चित्रकार र नाट्टा लुम्बिनी अध्यक्ष चन्द्र थापा, सोट्टो लुम्बिनीका संस्थापक अध्यक्ष सञ्जय बजिमय, बर्तमान अध्यक्ष श्रीचन्द गुप्ता, नाट्टाका प्रथम उपाध्यक्ष कुलचन्द्र पाण्डे, द्धितिय उपाध्यक्ष लक्की सिंह, तृतीय उपाध्यक्ष अन्जन श्रेष्ठ लगायत सहभागी थिए।
विदेशी एयरलाईन्सका प्रतिनिधिले सरकारले जतिसुकै सुविधा र दबाब दिएपनि यात्रुको चाप नभएसम्म विमान सेवा दिगो हुन नसक्ने बताएका थिए। उनीहरुले भैरहवामा अन्तर्राष्ट्रिय हवाइ यात्रुको चाप बढाउन ट्राभल व्यवसायीहरुलाई आग्रह समेत गरे। ‘३१ मार्चसम्म विन्टर सेड्युल छ। त्यो बेला काठमाडौंको एयरपोर्ट पनि पुरा समय सञ्चालन हुन सक्छ, यात्रुको चाप बढेन भने सरकारले दिएको सहुलियतले मात्र हामीलाई पर्ता पर्दैन तपाईहरुले यहाँ कनेक्टीभिटी बढाउनुपर्यो।’ अन्तर्राष्ट्रिय उडानका नेपाल प्रतिनिधिले भनेका थिए। यस विमानस्थललाई प्रस्थान र आगमनको गन्तव्य बिन्दु बनाउन निजी क्षेत्रले तत्कालै आन्तरिक कनेक्टिभिटी बढाउन लाग्नु पर्नेमा ति एयरलाइन्सहरुकोे जोड थियो।
नाट्टा लुम्बिनीका अध्यक्ष चन्द्र थापाले भैरहवाबाट अन्तर्राष्ट्रिय उडानका यात्रु कसरी बढाउने भनेर एयरलाइन्स र ट्राभलहरुबीच छलफल भएको बुद्धपरिपथलाई जानकारी दिए। ‘तपाईहरुले यात्रु बढाउन पर्यो, भैरहवासम्म आवतजावतको अभ्यास सिर्जना गर्न पर्यो भनेर उहाँहरुले हामीलाई भन्नुभएको छ।’ उनले भने। सरकारले घोषणा गरेको कतिपय छुट समेत एयरलाइन्सहरुले नपाएको गुनासो गरेका थापाले बताए। ‘सरकारले ३ हजार रुपैया छुटको घोषणा गरे पनि राजपत्रमा प्रकासन नहुँदासम्म उहाँहरुले छुट पाउनुभएको रहेनछ। यसमा बोलिदिन पर्यो भनेर हामीलाई भन्नुभएको थियो।’ उनले भने।
आफूहरुले यात्रुको चाप बढाउन र एयरलाइन्सका गुनासो सम्बोधनका लागि निरन्तर पहल गर्ने थापाले बताए। नाट्टा लुम्बिनीका अध्यक्ष थापाले भैरहवाबाट अन्तर्राष्ट्रिय उडान रोकिने हो कि भन्ने चिन्ता लागेको र उडान निरन्तरताको लागि विभिन्न कार्यक्रम गर्ने बताए। ‘अब गौतम बुद्ध अन्तर्राष्ट्रिय विमानस्थल प्रयोग गरौं भनेर विभिन्न ठाउँमा कार्यक्रम गर्छौ। आन्तरिक कनेक्टीभिटी बढाउन सुरुमा पश्चिम तिरका शहरहरुमा केही कार्यक्रम गर्ने सोँच बनाएका छौं।’ उनले भने ‘श्रम गन्तव्य र बुद्धिष्ट देशहरुमा पनि लुम्बिनीसँगै अन्तर्राष्ट्रिय विमानस्थलको प्रचार प्रसारमा लाग्ने छौं। सरकारलाई पनि उडानको निरन्तरताको वातावरण बनाउन दबाब दिन्छौंं।’
