भैरहवा – मौसमको कारण केही समय उडान रोकिएको भैरहवाको गौतम बुद्ध अन्तर्राष्ट्रिय विमानस्थलमा पुन चहलपहल बढेको छ। जाडो मौसममा हुस्सु लागेका कारण मंसिर अन्त्यबाट नियमित उडान हुन सकेको थिएन। मौसम खुल्न थालेसँगै उडानले गति लिएको छ।

केही दिन अघिबाट जजिरा एयरवेज, फ्लाई दुबइ र थाइएयर एशियाले उडान पुन उडान थालेका छन्। विहिवार ३ वटै जहाज भैरहवामा अवतरण गरेका छन्। जजिराको जहाजबाट १०२ यात्रु भैरहवा आएका छन््। १४९ जना भैरहवाबाट कुवेत प्रस्थान गरेका छन्।

थाइ एयर एशियाको जहाजबाट आउने यात्रु नभए पनि १२८ जना भैहरवाबाट थाइल्याण्ड प्रस्थान गरको गौतमबुद्ध अन्तर्राष्ट्रिय विमानस्थलका महाप्रबन्धक प्रतापबाबु तिवारीले जानकारी दिए। फ्लाई दुबईको जहाजबाट ४४ जना भैरहवा झरेका छन्। भैरहवाबाट २९ जना काठमाडौं हुँदै दुबइ प्रस्थान गरेका छन्। विचमा केही समय उडान नहुँदा यात्रुको संख्या केही कम भएको र अब यात्रुको चाप बढ्न सक्ने महाप्रबन्धक तिवारीले बताए।