उडान तालिकामा पनि छैन भैरहवाको नाम

भैरहवा-नेपाल बायुसेवा निगम (नेपाल एयरलाइन्स)को जहाजले हप्तामा ४ दिन काठमाडौं भैरहवा-दुबई उडानको तालिका छ। निगमको जहाज आइतबार, सोमबार, बुधबार र शुक्रबार बेलुका साढे ९ बजे उडान गरि भैरहवाको गौतम बुद्ध विमानस्थगलमा अवतरण गर्छ। भैरहवाबाट राती ११ बजेर ४५ मिनेटमा दुबईको लागि उड्छ।

तर अन्तर्राष्ट्रिय उडानको भैरहवा-दुबईको भाडादर देखिदैन। निगमको बुकिङ सिष्टममा काठमाडौंबाट दुबई सहित अन्य उडानहरुको भाडादर राखिएको छ। तर सिष्टममा भैरहवा र दुबई राखेर सर्च गर्दा ‘खोजेको मितिमा उडान फेला परेन’ भन्ने आउँछ। यसो हुँदा निगमको जहाजमा भैरहवाबाट सिधा दुबई उडान गर्न र टिकट बुक गर्न खोज्नेहरुको असहज हुने गर्दछ।

दुबई-भैरहवा-काठमाडौं उडान गरिरहेको फ्लाई दुबईले आफ्नो वेबसाइटको बुकिङ सिष्टममा भैरहवाको लागि पनि स्पष्ट भाडादर उल्लेख गरेको छ। दुबई-भैरहवा र भैरहवा-दुबई दुईवटै रुटको भाडादर बुकिङ सिष्टममा स्पष्ट देखिन्छ। तर नेपाल एयरलाईन्सले भैरहवालाई उपेक्षा गरेको देखिन्छ।

भाडादर मात्र होइन नेपाल एयरलाईन्सले आफ्नो अन्तर्राष्ट्रिय उडान तालिकामा समेत भैरहवा उल्लेख गरेको छैन।

८ नोभेम्बरदेखी २९ मार्चसम्मको विन्टर सेड्युलमा विभिन्न गन्तव्यका उडानहरु उल्लेख छ। त्यसमा भैरहवा उल्लेख छैन। नेपाल बायुसेवा निगम भैरहवा कार्यालय प्रमुख प्रकाश अधिकारीले बुकिङ सिष्टममा भैरहवा-दुबईको भाडादर उल्लेख नभएको बारे निगमको मार्केटिङ विभागमा बुझ्ने बताए ।