भैरहवा -पर्यटन व्यवसायीहरुले नेपाल बायुसेवा निगमले आफ्नो बुकिङ सिष्टममा भैरहवा दुबईको भाडादर नराखेर गौतम बुद्ध अन्तर्राष्ट्रिय विमानस्थललाई वेवास्ता गरेको बताएका छन्। सातामा ४ दिन नेपाल बायु सेवा निगमले काठमाडौं भैरहवा दुबई उडान गर्दै आएको छ। तर उसले भैरहवा दुबईको भाडादर आफ्नो बुकिङ सिष्टममा उल्लेख गरेको छैन।
नेपाल एयरलाइन्सको बुकिङ सिष्टममा किन देखिँदैन भैरहवा-दुबई उडानको भाडादर ?
नाट्टा लुम्बिनीका पूर्व अध्यक्ष सागर अधिकारीले बायुसेवा निगमलाई भैरहवाको उडान बारे मत्लब नै नराखेको बताए। ‘आफ्नो व्यवसाय र उडानको प्रवद्र्धन गर्न अनलाइन बुकिङ सिष्टम देखाउनुपर्ने हो। तर निगमलाई त्यसको मत्लब छैन।’ उनले भने ‘आफ्नो जहाज उडे उड्छ नउडे उड्दैन भन्ने निगमको पारा छ ।’ निगमको उडान तालिका भएपनि तालिका अनुसार कहिले उडान हुने कहिले नहुने भन्दै सेवा भरपर्दो नभएको अधिकारीले बताए।
अर्का पर्यटन व्यवसायी तथा सोट्टो लुम्बिनीका पूर्व अध्यक्ष सञ्जय बजिमयले निगमको जहाज भैरहवा आए पनि त्यसको अनुभूती गर्न नपाएको बताए। ‘निगमको जहाज आउँछ ढोका समेत नखोलीकन जान्छ। सस्तोमा तेल मात्र भर्न आउने हो।’ उनले भने ‘अरु अन्तराष्ट्रिय जहाजले भैरहवाको लागि पनि स्पष्ट भाडादर राखेका छन्। हामीले टिकट पनि काटिरहेका छौं। निगमले भैरहवाको भाडादर राखेको देखिन्न।’
भैरहवामा निगमले २५ जना कर्मचारी राखेर, ग्राउण्ड हेण्डलिङ पाएर पनि भैरहवाको उडानप्रति वेवास्ता गरेको बजिमयको भनाइ छ। ‘ कर्मचारी र सुविधा पाएर पनि यहाँ निगमको आन्तरिक उडान पनि छैन। भएको अन्तराष्ट्रिय उडान पनि नाम मात्रको छ।’ उनले भने। नेपाल एयरलाइन्सले भैरहवा दुबई सिधा उडान गरेमा आफूहरुले निगमको सञ्जाललाई संसारसाझ जोडदिन सक्ने बजिमयले बताए।
