बुटवलमा पर्यटन नीति सम्बन्धी अन्तरक्रिया

बुटवल – सम्भावना भएको र प्रतिफल आउने कार्यक्रममा मात्र पर्यटनको बजेट विनियोजन गर्नुपर्ने सरोकारवालाहरुले बताएका छन्। तिनै तहका सरकारले पर्यटनको नाममा साना आयोजनाहरुमा समेत बजेट छर्ने गरेको भन्दै त्यसले प्रतिफल नदिने उनीहरुको भनाइ छ।

लुम्बिनी प्रदेशको उद्योग पर्यटन तथा यातायात मन्त्रालयले बुटवलमा आयोजना गरेको पर्यटन नीति सम्बन्धी अन्तरक्रिया कार्यक्रममा सहभागीले पर्याप्त अध्ययन गरेर मात्र पर्यटनको विकास र पूर्वाधारको कार्यक्रम बनाउनुपर्ने धारणा राखे।
कार्यक्रममा लुम्बिनी प्रदेशका उद्योग, पर्यटन तथा यातायात मन्त्री प्रचण्डविक्रम न्यौपानेले सम्भावना भएको महत्वपूर्ण ठाउँमा मात्र पर्यटन कार्यक्रम केन्द्रीत हुने बताए। उनले पर्यटक भित्राउन र रोजगारी सिर्जना हुन सक्ने ठाउँको मात्र योजना ल्याउने जिल्ला र पालिकाहरुलाई आग्रह गरे । ‘हामीसँगै गन्तव्य सूचीमा परेका थुप्रै ठाउँ छन्। सबैमा लगानी गर्न सक्दैनौं। गर्नुपर्ने जिल्लाका सम्भावना भएका एउटा या दुई वटा सम्भावना भएका ठाउँको योजना ल्याउनहोुस्’ उनले भने ‘यसबाट पर्यटक भित्राउन, रोजगारी सिर्जना गर्न र समृद्धि ल्याउन सकिन्छ भन्ने खालका योजना ल्याउनुभयो भने प्रदेशको मन्त्रालयले त्यसमा बजेट हाल्छ।’

मन्त्री न्यौपानेले पर्यटन क्षेत्रको विकासको लागि तीनै तहका सरकारको आ आफ्नै दायीत्व भएको भन्दै संघ सरकारले दस दस लाखका योजना बाड्न नसुहाउने उल्लेख गरे। बुद्ध जन्मस्थल लुम्बिनीको विकासमा प्रदेश सरकारको भूमिका खासै नभएपछि प्रर्वद्धनको क्षेत्रमा आफूहरुले ध्यान दिएको मन्त्री न्यौपानेले बताए। उनले भैरहवाबाट अन्तर्राष्ट्रिय उडानको लागि प्रदेश सरकारले निरन्तर दबाब दिने उल्लेख गरे। पर्यटनको क्षेत्रबाट लुम्बिनी प्रदेशलाई समृद्ध बनाउने गरि पर्यटन नीति बनाउन लागेको न्यौपानेले जानकारी दिए।

कार्यक्रममा पर्यटन नीतिको मस्यौदा प्रस्तुत गर्र्दै पर्यटन विज्ञ रमेशकुमार अधिकारीले सम्भावना बोकेका र आकर्षणको पहिचान गरि पर्यटकीय गन्तव्य सुचिकृत गर्नुपर्ने, युवाहरुलाई पर्यटन व्यवसायमा लाग्न प्रेरित गर्नुपर्ने, सार्वजनिक निजी साझेदारीमा पर्यटनका लागि जनशक्ती उत्पादन गर्ने, पर्यटन बजारिकरणका कार्यक्रमहरु सञ्चालन गर्नुपर्ने बताए। पर्यटन मन्त्रालयका प्रवक्ता गणेश घिमिरेले प्रदेश सरकारले गरेका योजना तथा कार्यक्रम बारे उल्लेख गरेका थिए।

बुटवल उपमहानगरपालिकाका प्रमुख खेलराज पाण्डेले उत्तर र दक्षिणका गन्तव्यलाई जोड्ने गरि उपमहानगरले कार्यक्रम गर्ने जानकारी दिए। उपमहानगरले कालिगण्डकी करिडोरमार्फत भारतदेखी मुक्तीनाथसम्म र चिनको कोरोलाबाट लुम्बिनीसम्मको धार्मिक यात्रा गर्न लागेको उनले बताए। पर्यटन परिषद लुम्बिनीका कार्यकारी निर्देशक रामु जोसीले पालिका र जिल्ला स्तरमा पनि पर्यटन विकास समिति बन्नुपर्ने बताए। उनले बुद्धिष्ट पर्यटनको लागि प्रदेशमा छुट्टै संयन्त्र आवश्यक रहेको उल्लेख गरे ।
लुम्बिनी विकास कोषका सूचना अधिकृत हरिध्वज राइले बृहत्तर लुम्बिनी क्षेत्रलाई समेटेर पर्यटकीय नीति बन्नुपर्ने धारणा राखे । संस्कृति तथा पर्यटन विद डा. गितु गिरिले पर्यटकीय सेवा गुणस्तरिय हुनुपर्ने भनाइ राखे।

प्रदेश योजना आयोग सदस्य डा. सुदन ओलीले ग्रेटर लुम्बिनीलाई ध्यान दिएर प्रदेशले कार्यक्रम बनाएको बताए । कांग्रेसका प्रदेश सदस्य विष्णु पोखरेलले साना आयोजनामा नभई ठूला र महत्वपूर्ण आयोजनामा ध्यान दिन आग्रह गरे। गाउँपालिका महासंघ लुम्बिनीका अध्यक्ष राजेन्द्र प्याकुरेलले पर्यटन क्षेत्रका लागि स्थानिय र प्रदेश सरकार नजिक रहेर काम गर्नुपर्ने धारणा राखे । नाट्टा लुम्बिनीका अध्यक्ष चन्द्र थापाले भैरहवाबाट अन्तर्राष्ट्रिय उडानको निरन्तरताको लागि प्रदेश सरकारले पनि पहल गर्नुपर्ने बताए ।

पत्रकार महासंघ रुपन्देहीका अध्यक्ष दिनेश पाण्डेले पर्यटन क्षेत्रको प्रवद्र्धनको लागि सञ्चार क्षेत्रको महत्वपूर्ण भूमिका हुने उल्लेख गरे । पर्यटन मामिलाका लेखक युवराज कंडेलले पर्यटकीय विकासको लागि अन्तरपालिका सम्बन्ध आवश्यक भएको बताए। पर्यटन डिभिजन कार्यालय भैरहवाका प्रमुख नेत्र भुसालको सहजिकरणमा भएको कार्यक्रममा नेपाल उद्योग बाणिज्य महासंघ लुम्बिनीका उपाध्यक्ष कुलप्रसाद न्यौपाने, होटल व्यवसायी महासंघका राजेश महोत्रा, नेत्र पाठक, डा. चिरनजीवी देवकोटा, द्रोण खत्री, सागर पोखरेल पर्शुराम भट्राई, विष्णु शर्मा, रिता बुढाथोकी लगायतले पर्यटन नीतिका सम्बन्धमा आ-आफ्ना सुझाब राखेका थिए ।