बुटवल- रोटरी दिवसको अवसरमा बुटवलमा सम्पदा पदयात्रा गरिएको छ। रोटरी डिष्ट्रिक ३२९२ नेपाल–भुटान रिजन ५ अन्तरगतका क्लबहरुले आइतबार सामुहिक रुपमा बटौली क्षेत्रमा पदयात्रा गर्दै गरेका हुन्।
पदयात्राका लागि रोटरीका सदस्यहरु विहानै बुटवल १ को गणेशथानमा जम्मा भएका थिए। त्यसपछि बटौलीका विभिन्न ठाउँ अवलोकन गर्दै पैदलयात्रा गरेका हुन्। बटौली क्षेत्र बुटवलको पुरानो र ऐतिहासिक बजार भएको ठाउँ हो। विगतमा हाम्रा बाबुबाजेहरु पहाडका विभिन्न जिल्लाबाट केही दिन हिडेर बटौलीमा किनमेल गर्न आउँथे। अहिले पनि बटौली क्षेत्रमा पुराना मठ मन्दिर, सम्पदा र घरहरु रहेका छन्।
नेपालले अंग्रेजलाई पराजित गरेको स्थान जितगढी किल्लामा पुगेर सम्पदा पदयात्रा सम्पन्न भएको थियो। ऐतिहासिक र पुरातात्वीक महत्वको बटौलीलाई चिनाउन १२० औं रोटरी दिवसको अवसरमा पदयात्रा आयोजना गरिएको रोटरी क्लब अफ बुटवलका अध्यक्ष प्रज्वल थान्जुले बताए।
रोटरी क्लब अफ डाउनटाउनका अध्यक्ष शिव ज्ञवालीले बटौली पुरानो ऐतिहासिक बजारसँगै जितगढी किल्ला पनि भएकाले बुटवलमा पर्यटक आकर्षित गर्न सकिने उल्लेख गरे।कार्यक्रममा एजी खिमानन्द पाण्डे, डिष्ट्रिक अफिसियल लक्ष्मण ज्ञवाली, ओम जैसीले समाजमा रोटरीको भूमिकाको बारेमा प्रकाश पारेका थिए। पदयात्रामा करिब डेढसय जना सहभागी थिए।
