पोखरा -पोखरामा पहिलो त्रिदेशीय पर्यटन एक्स्पो शुरु भएको छ । छिमेकी मुलुक भारत र चीनबाट बढीभन्दा बढी विदेशी पर्यटक भित्राउने उद्देश्यले नेपालको पर्यटन राजधानी पोखरामा नेपाल इन्डिया चाइना एक्पो  (नाइस)सुरु भएको हो।

फागुन १२ देखि १४ गतेसम्म हुने नाईसमा ८० बायर्स, ७० सेलर्स र ७५ एक्जिविटरसहित ६ सय भन्दा बढीको सहभागिता रहेको छ । प्यासिफिक एशिया ट्राभल एशोसिएसन (पाटा) नेपाल च्याप्टरले नेपाल पर्यटन बोर्ड, पोखरा पर्यटन परिषद् र अन्य सरकारी तथा निजी क्षेत्रका साझेदार सरोकारवालाहरुको सहकार्यमा आयोजित एक्स्पोले तीन देशका सरकारी र निजी क्षेत्रका पर्यटन र आतिथ्य सरोकारवाला संस्थाहरूलाई एकै थलोमा ल्याएर उनीहरुबीच व्यावसायिक अनुभवको साथै नेटवर्किङ र व्यापार अवसरहरू उपलब्ध गराइएको छ।

एक्स्पोले ट्राभल ट्रेड संगठनहरूबीचको सम्पर्क, छलफल गर्न र तीन देशको पर्यटन वृद्धि गर्ने अवसर प्रदान गर्नेछ। साथै नेपाल भ्रमण गर्ने क्रेताहरू र अन्तर्राष्ट्रिय प्रतिनिधिहरूका लागि, प्रि–एक्स्पो गन्तव्य अनुभव यात्राहरू र पोखरा आसपासको भ्रमणले प्राकृति, साहसिक र संस्कृतिको अनुपम मिश्रणको अनुभूती गर्नेछन्।

‘नाइस फर माईस एण्ड मोर’ भन्ने नाराका साथ आयोजना भएको एक्स्पोले पोखरालाई पदयात्रा र साहसिक पर्यटन केन्द्रको रूपमा मात्र नभई माईस पर्यटन (अर्थात् बैठक, सभा सम्मेलन, प्रोत्साहन, विवाह तथा अन्य उत्सव, महोत्सव, समारोह, मेला र प्रदर्शनी) का लागि आकर्षक गन्तव्यको रूपमा प्रवद्र्धन गर्ने पाटा नेपालले जनाएको छ। पाटा नेपाल च्याप्टरका प्रमुख कार्यकारी अधिकृत (सिइओ) सुरेशसिंह बुडालले दुई ठुला अर्थतन्त्र तथा पर्यटन स्रोत बजार भारत र चीनमा नेपालको पर्यटन सम्भाव्यता र एकीकृत व्यावसायिक अवसरलाई प्रवद्र्धनगर्ने उद्देश्यले नाइस आयोजना गरिएको बताए।