लुम्बिनी- सन् २०२४ को फेबुररी महिनामा ४ हजार ६२० थाइ पर्यटक बुद्ध जन्मस्थल लुम्बिनी आएका छन्। गत महिना लुम्बिनी आएका तेस्रो मुलुकका पर्यटक मध्ये सबै भन्दा बढि थाइ पर्यटक हुन्।
लुम्बिनीमा अहिले धार्मिक गतिविधी भइरहेको छ। जसका कारण बुद्धिष्ट मुलुक थाइल्याण्डबाट आएका भिक्षुहरुको चहलपहल बढेको हो। लुम्बिनी विकास कोषका सुचना अधिकारी राजन बस्नेतले दुई वटा धार्मिक कार्यक्रमका कारण थाइ पर्यटकहरुको चहलपहल बढेको बताए। ‘फागुन १६ गतेबाट १२ सय नेपालीहरुलाई प्रवज्या गर्ने काम चलिरहेको छ। एक महिना चल्छ। यसको लागि आर्थिक सहयोग थाइल्याण्डबाटै भएको छ।’ उनले भने ‘यही अवसरमा लुम्बिनी भ्रमण गर्ने भनेर थुप्रै थाइ नागरिकहरु आउनुभएको छ। अर्को मायादवी मन्दिर परिषरमा त्रिपिटक बाचन भएको छ। यी कार्यक्रमका कारण थाइहरुको चहलपहल बढेको छ।’
बस्नेतले अहिले पनि धार्मिक गतिविधि भएकाले मार्च महिनामा थाइ पर्यटकको चहलपहल अझै बढ्ने उल्लेख गरे। अहिले भइरहेको पूजाले थाइ सहित तेस्रो मुलुकका पर्यटक बढ्दै जाने अनुमान गरिएको उनले बताए।
विगतमा पनि थाइ पर्यटकहरु फेबुररी महिनामा धेरै आउने गरेका थिए। २०२४ को फेबुररीमा ३ हजार ९८१ थाइ पर्यटक लुम्बिनी आएका थिए। २०२३ को फेबुररीमा ३ हजार ३६७ र कोभिड अघि सन् २०१९ मा ६ हजार २०८ थाइ पर्यटक लुम्बिनी आएका थिए। लुम्बिनी होटल संघका उपाध्यक्ष लिलामणी शर्माले थाइ पर्यटकको लागि फेबुररी महिना उपयुक्त सिजन भएको बताए। ‘थाइल्याण्डको मौसम र यहाँको फेबुररी मौसम मिल्छ। उहाँहरुलाई जाडोमा अलि गाह्रो हुन्छ।’ उनले भने ‘त्यसैले उहाँहरु डिसेम्बर र जनवरीमा त्यती आउनुहुन्न। नोभेम्बर, फेबुररी र मार्चमा थाइहरुको चहलपहल हुन्छ।’
शर्माले थाइ पर्यटकहरु धेरै जसो लुम्बिनीको विहारमा बस्ने गरेको उल्लेख गरे। ‘लुम्बिनी परिसर भित्र त थाइ पर्यटकहरुको चहलपहल छ। तर बाहिर हाम्रो होटलहरुमा त्यती देखिनुभएको छैन।’ उनले भने ‘भिक्षुहरु सकेसम्म विहारमै बस्ने गरेका छन्। कि ठूलै स्टार होटलमा बस्ने गरेका छन्। लुम्बिनी र भैरहवाका केही तारे होटलमा उहाँहरु बस्नुभएको छ।’
गत फेबुररी महिनामा तेस्रो मुलुकबाट कुल १७ हजार ७२७ पर्यटक लुम्बिनी आएका छन्। जसमा सबै भन्दा बढि थाइ पर्यटक हुन्। त्यसपछि ३ हजार ६८४ श्रीलंकन, २ हजार ६५७ म्यानमारका, १ हजार ८०५ भियतनामबाट र १ हजार २४३ चाइनिज पर्यटक लुम्बिनी आएका हुन्।
