‘यहाँका पर्यटकीय स्थलबारे थाइल्याण्डमा प्रचार प्रसार गर्नुपर्छ’

बुटवल – थाइ एयर एशियाले अहिले बैंकक-भैरहवा-बैंकक उडान गरिरहेको छ। एयर एशियाको जहाज प्रत्येक सोमबार गौतम बुद्ध अन्तर्राष्ट्रिय विमानस्थलमा अवतरण भइ उडान गर्ने गरेको छ।

मार्चमा उडान तालिका यथावत भएपनि भैरहवाको लागि अप्रिल र त्यसपछिको टिकट बुकिङ खुलेको छैन। अर्को महिनाको लागि तालिका सार्वजनिक नहुँदा र टिकट नखुल्दा उडान नहुने हो कि भन्ने आसंका पनि गर्न थालिएको छ। थाइ एयर एशियाले भने उडानको योजना बनिरहेको र निर्णय भइनसकेको जनाएको छ। एयर एशियाका सेल्स म्यानेजर सागर चित्रकारले हप्ता दिनभित्र समर सेड्युलको उडानबारे निर्णय हुने जानकारी दिए। ‘एयर क्राफ्टहरु पनि हाम्रो हेड अफिसले वर्कआउट गरिरहेको छ। एयर क्राफ्टहरु पनि मिलाउनुपर्ने छ।’ उनले भने ‘अहिले निर्णय भइसकेको छैन। भैरहवाको उडान बारे हप्ता दिन भित्र हेड अफिसबाट केही निर्णय भएर आउला।’

थाइएयर एशियाले भैरहवाको लागि राम्रै यात्रु पाइरहेको छ। गत सोमबार १७७ जना भैरहवाबाट बैंकक प्रस्तान गरेका छन्। त्यस्तै ४८ जना बैंककबाट भैरहवा आएका छन्। अघिल्लो हप्ता पनि भैरहवाबाट थाइल्याण्ड जाने यात्रुहरुको संख्या राम्रो छ।
थाइएयर एशियाका सेल्स म्यानेजर चित्रकारले भैरहवाबाट उडानको निरन्तरताको लागि अझै राम्रोसँग प्रचार प्रसार हुनुपर्ने बताए। ‘हाम्रो अफिसमा आएर अनि काठमाडौंको एजेन्सीबाट टिकट लिनेहरु कतिपयलाई भैरहवाबाट पनि उडान छ भन्ने अझै थाह छैन।’ उनले भने ‘उडान बारे अलि बढि जनचेता फैलाउन पर्यो। अहिले डिजिटल मार्केटिङ पावरफूल छ। ट्राभल एजेन्सीहरुले डिजिटल माध्यमबाट प्रचार प्रसार बढाउनुपर्यो। थाइल्याण्ड घुम्न जान चाहानेहरु माझ भैरहवाबाट पनि उडान छ भन्ने कुरा पुग्न पर्यो।’

चित्रकारले उडानको प्रवद्र्धनको लागि सुरुमा आफूहरुले थाइल्याण्डका २१ जना टुरको व्यवस्थापन गर्नेहरुलाई ल्याएर लुम्बिनी र पोखरा घुमाएको बताए। उनले नेपालको तर्फबाट पनि थाइल्याण्डमा त्यस खालका प्रवद्र्धनात्मक कार्यक्रम गर्नुपर्ने उल्लेख गरे। ‘पर्यटन बोर्ड मार्फत टुर व्यवसायीहरु थाइल्याण्ड गएर यहाँका पर्यटकीय स्थलबार त्यहाँ प्रस्तुतीकरण गर्यो भने राम्रो प्रचार प्रसार हुन्छ।’ चित्रकारले भने ‘त्यसो गरेमा थाइल्याण्डका टुर एजेन्सीहरुले लुम्बिनी पोखरा लगायतका ठाउँ समेटेर प्याकेज बनाउँछन्। भैरहवाबाट उडानको राम्रो वातावरण बन्छ।’