तीन महिनामा हवाइ मार्गबाट १,२५० चिनियाँ पर्यटक पोखरा ल्याउने प्रयास

पोखरा-आगामी चैत्र ५ गतेबाट हुने पोखरा छेन्दु उडानले समग्र गण्डकी प्रदेशकै पर्यटन चलायमान हुने आशा गरिएको छ। हिमालयन एयरलाइन्सले चैत ५ गतेबाट पोखराबाट चिनको सिचुवान प्रान्त स्थित छेन्दुमा चार्टर उडान गर्न लागेको छ। पोखरा पर्यटन परिषदको नेतृत्वमा नेपाल स्थित चिनियाँ राजदुतावास र सिचुवान एअरलाईन्स सँगको सहकार्यमा यो अन्तराष्ट्रिय उडान गर्न लागिएको हो।

जस अनुसार चैत ५ गते विहान १०ः०० बजे १२७ चिनियाँ यात्रु लिएर जहाज पोखरा विमानस्थलमा अवतरण गर्ने छ।सोही दिन दिउसो १२ः०० बजे १२७ जना पर्यटन व्यवसायीहरु चाइनाको छेन्दु प्रस्थान गर्ने छन। पहिलो व्यवसायिक चार्टर उडानमा पोखरा महानगरपालिकाका प्रमुख धनराज आचार्य, नेपाल पर्यटन वोर्ड गण्डकी प्रदेशका प्रमुख मणिराज लामिछाने, पोखरा भ्रमण वर्ष २०२५ कार्यसम्पादन समितिका संयोजक गोपि वहादुर भट्टराइ, पोखरा पर्यटन परिषद्का अध्यक्ष श्री तारानाथ पगारी लगायत पर्यटन संघ संस्थाका अध्यक्ष तथा कार्यसमिति र समग्र व्यवसायीहरु उक्त उडानमा सहभागी हुने छन्।

भ्रमणमा सहभागीहरुले चिनको सिचुवान प्रदेको पर्यटनका विकास, विस्तारका बारे जानकारी लिइनेछन्। त्यहाँ पर्यटन सम्बन्धी विभिन्न कार्यक्रममा सहभागी हुनेछन्। चार्टड उडान सुरु भएपछि अवको तीन महिनाको अवधिमा करिव १,२५० चिनियाँ पर्यटक चीनको सिचुवान प्रदेशबाट हवाई मार्गवाट सिधा पोखरा अन्तराष्ट्रिय विमानस्थलमा अवतरण गराउन प्रयासरत रहेको चिनियाँ दुतावास, सिचुवान एअरलाईन्स र चाइना ट्राभल इन्टरनेश्नल छेन्दुले जानकारी गराएका छन। सुरुवाती चरणमा केही व्यावसायिक चार्टर उडानबाट सुरु गरेर यसलाई व्यवसायीक उडानमा परिणत गरी नियमित अन्तर्राष्ट्रिय उडान गने कार्यको लागि निरन्तर प्रयास गरेको पोखरा पर्यटन परिषद्ले जनाएको छ।