तौलीहवा –कपिलस्तुको निग्रोधाराम कुदानमा बुद्ध महार्फिर्ती आगमन उत्सव मनाइएको छ। गौतम बुद्धले ज्ञान प्राप्त गरेपछि पहिलो पटक कपिलबस्तु आउँदा फागु पूर्णिमामा मातापितासँग निग्राधाराममा भेट गरेका थिए। सोही दिनको सम्झनामा रेडियो टुरिजम र गच्छामी मिडिया ग्रुपको आयोजनामा महाफिर्ती आगमन उत्सव मनाइएको हो।
कार्यक्रममा बुद्ध दर्शनका ज्ञाता, अभियान कर्मी र विदेशी पर्यटकहरुले फूल साटासाट गरेर सद्भाव आदान प्रदान गरेका थिए। सो अवसरमा ५० जना भन्दा बढि विदेशी पर्यटकहरु सहभागी थिए। कार्यक्रममा अखिल नेपाल भिक्षु महासंघका पूर्व अध्यक्ष भिक्षु मैत्रीले निग्राधाम कुदानको महत्व बारे बताएका थिए। ‘कपिलबस्तुबाट गयातिर गएर ६ वर्षसम्म तपस्या गरेर बुद्धत्व प्राप्त भइसकेपछि सारनाथमा उहाँले ज्ञान बाँड्नुभयो। त्यसपछि यहाँ आउनुभएको थियो।’ उनले भने ‘भगवान बुद्धले यहाँ आएर माता पितासँग भेटेको आजको दिन थियो। त्यसैले यो अति महत्वपूर्ण ठाउँ हो।’
लुम्बिनी विकास कोषका सद्भावना दुत विक्रम पाँडेकाजीले बुद्धको जिवनकथा सँग जोडिएका पर्व र उत्सव भइरहनुपर्ने बताए। ‘संसारमा अहिले एक अर्ब भन्दा बढि बुद्ध धर्मलम्बी छन्। उनीहरुलाई आकर्षण गर्न सक्यो भने यो क्षेत्रमा बुद्धिष्ट पर्यटकहरु बढ्छन्।’ उनले भने ‘उनीहरुलाई आकर्षण गर्न बुद्धको जिवनकथा सँग सम्बन्धी यस्ता पर्व र उत्सवहरु गरिरहनुपर्छ।’ यस्ता उत्सवहरु मनाइरहँदा बुद्ध दर्शन र यस क्षेत्रका विश्वमा थप प्रचार हुने र बुद्धिष्ट मुलुकबाट पर्यटक आगमन बढ्दै जाने सद्भावना दुत पाँडेकाजीले उल्लेख गरे।
कार्यक्रममा कपिलबस्तु नगरपालिका ३ का वडाध्यक्ष रुद्रप्रकाश गैरे, लुम्बिनी विकास कोषका परिषद सदस्य गोविकृष्ण शर्मा, गच्छामी मिडिया ग्रुपका अध्यक्ष मनोज श्रीवास्तव, ग्रुपका निर्देशक खगप्रसाद चापागाई लगायतले आगामी दिनमा निग्रोधराममा महाफिर्ती आगमन उत्सव भव्य रुपमा मनाउनुपर्ने बताए। सद्भाव कार्यक्रम पछि कुदानमा दिप प्रज्वलन समेत गरिएको थियो।
