काठमाडौं – म्यानमारको यांगोनमा यही चैत ८ गते शुक्रबारदेखि ’नेपाल–म्यानमार व्यापार र पर्यटन एक्स्पो २०२५’ आयोजना हुँदैछ। गौतमबुद्धको जन्मस्थल लुम्बिनीलाई विश्वमा प्रचारप्रसार गर्ने र बौद्ध धर्मलम्बीलाई लुम्बिनी भ्रमणको आह्वान गर्न यांगुनमा चैत्र ८ र ९ गते नेपाल–म्यानमार एक्स्पो हुन लागेको हो।

नेपाली दूतावास, म्यानमार र नेपाल पर्यटन बोर्डको संयुक्त आयोजनामा हुन लागेको एक्सपोले नेपाल र म्यानमारबीच आर्थिक, सांस्कृतिक र पर्यटन क्षेत्रमा सहकार्य बढाउन सघाउ पुर्याउने अपेक्षा गरिएको छ । यस एक्सपोमा व्यापार, आईटी सफ्टवेयर र पर्यटन क्षेत्रमा सहकार्यका नयाँ अवसरहरूबारे छलफल हुने नेपाल पर्यटन बोर्डका बरिष्ठ अधिकृत गोकुल भण्डारीले जानकारी दिए। नेपाल पर्यटन बोर्डसहित पर्यटनका क्षेत्रमा काम गरिरहेका ५ कम्पनीहरु, आईटी सफ्टवेयर तथा कृषि जस्ता व्यापारिक क्षेत्रका प्रतिनिधिहरूले एक्स्पोमा सहभागिता जनाउने उनले बताए।

जस अनुसार होटल मनास्लु प्रा. लि., होटल रत्नसम्वय (लुम्बिनी), हिमालयन ३६०, जुगल होलिडेज प्रा. लि., बौद्ध सर्किट डट कम प्रालि, र नमस्ते पर्यटन र होलिडेज प्रालि जस्ता कम्पनीहरूले आफ्नो सेवाहरू प्रस्तुत गर्नेछन्।