ओली भन्छन्ः विमानस्थल चलाएझै गर्ने होइन दिगो ढंगले चलाइन्छ

काठमाडौं-प्रधानमन्त्री केपी शर्मा ओलीले भैरहवाको गौतम बुद्ध अन्तर्राष्ट्रिय विमानस्थल दिगो ढंगले चलाइने दाबी गरेका छन्। प्रतिनिधि सभामा विहिवार भएको सांसदसँगको प्रश्नोत्तर कार्यक्रममा ओलीले भैरहवाको अन्तर्राष्ट्रिय विमानस्थल देखाउनको लागि नभएको प्रतिक्रिया दिए। रुपन्देही क्षेत्र नम्बर ५ का सांसद बासुदेव घिमिरेको प्रश्नमा उनले विमानस्थल देखाउन नभई चलाउन बनाएको प्रतिक्रिया दिए।

भैरहवाको अन्तराष्ट्रिय उडान बारे यस्तो छ प्रश्नोत्तर :

सांसद घिमिरे

गौतम बुद्ध अन्तर्राष्ट्रिय विमानस्थल लामो प्रयासपछि सम्माननिय ज्युकै पहलमा आंसिक सञ्चालनमा आएको छ। तर उक्त विमानस्थलको दिगो सञ्चालनको विषयमा अझै विभिन्न शंका उपशंका देखा परेकोले सरकारले उक्त विमानस्थल पूर्ण र दिगो सञ्चालनको लागि के कस्तो प्रबन्ध मिलाएको छ?

प्रधानमन्त्री ओली
गौतम बुद्ध अन्तर्राष्ट्रिय विमानस्थलको दिगो सञ्चालनको लागि प्रश्न उठाउनुभएको छ। सरकारले सम्बद्ध निकायहरुसँग छलफल गरेर कार्ययोजना बनाएर कार्यन्वयन गरिरहेको छ। यो विमानस्थल देखाउनको लागि बनाएको होइन चलाउनको लागि बनाएको हो। चलाइन्छ। चलाउने भनेको यो अस्थायी एसो चलाएझै गर्ने होइन। दिगो ढंगले त्यसलाई चलाइन्छ। यसको लागि विभिन्न फेसिलेटेडहरु डेभलप गरेको आदी आदि प्रभावकारी कदमहरु चालेको कुरा पनि स्मरण गराउन चाहान्छु। यात्रु सेवा शुल्कमा छुट, ग्राउण्ड हेण्डलिङ, ल्याण्डीङ पार्किङ र नेभिगेसन शुल्कमा छुट जस्ता सहुलियत एवं प्रोत्साहनका कार्यक्रमहरु सञ्चालनमा सरकारले ल्याएको छ। यसलाई दिगो ढंगले चलाउने सन्दर्भमा अगाडि बढौं भन्ने भनेर नै यो काम गरिएको हो। हाल जजिरा, फ्लाई दुबइ, एयर एशिया नेपाल एयरलाइन्सले उक्त विमानस्थलबाट अन्तर्राष्ट्रिय उडान सञ्चालन गरिरहेका छन्। सञ्चालन भइसकेको छ, प्रारम्भ भइसकेको छ। ४ वटा एयरलाइन्सले उडान सुरु गरिसकेका छन््। अन्तर्राष्ट्रिय उडान अगाडी बढ्छ भनेर म आश्वास्त पार्न चाहान्छु। श्रम तथा रोजगार कार्यालय बुटवलबाट श्रम स्विकृती प्रदान गर्न सुरु भएको छ। साथै अध्यागमन, मुद्रा सटही, लगायतका बैंकिङ सुविधा विमानस्थलमै प्रदान गर्ने व्यवस्था मिलाइएको छ र भविश्यमा उक्त विमानस्थललाई पूर्ण क्षमताका साथ सञ्चालन गर्ने गरि काम भइरहेको छ। यो पूर्ण क्षमताका साथ सञ्चालन गरिने कुरा म माननिय ज्युलाई अवगत गराउन चाहान्छु।