प्रधानमन्त्री सहित सम्बन्धित निकाय बसेर निर्णायक छलफल गर्छौं

भैरहवा-संस्कृति पर्यटन तथा नागरिक उड्यनमन्त्री बद्रीप्रसाद पाण्डेले भैरहवाबाट अन्तर्राष्ट्रिय उडानको निरन्तरताको लागि थप पहल गर्ने बताएका छन्। गौतम बुद्ध अन्तराष्ट्रिय विमानस्थलमा आज विमानस्थलका अधिकारी, पर्यटन व्यवसायी र सरोकारवालासँगको छलफलमा मन्त्री पाण्डेले अन्तराष्ट्रिय उडान निरन्तरताको लागि सरकारले ल्याएको कार्ययोजना अगाडी बढाउन प्रधानमन्त्रीसँग बसेर निर्णायक छलफल गर्ने जानकारी दिए।

भैरहवाको गौतम बुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल सञ्चालनको लागि नेपाल सरकार मन्त्रीपरिषद बैठकले केही समय अघि कार्ययोजना ल्याएको थियो। उक्त कार्ययोजना पूर्ण रुपमा कार्यान्वयन नभएको श्रम सम्बन्धी सेवाहरु रुपन्देही नआइसकेको भन्दै व्यवसायीहरुले गुनासो गरेका थिए। मन्त्री पाण्डेले कार्ययोजना कार्यान्वयनको लागि सम्बन्धीत मन्त्रालय र निकायबीच छिट्टै प्रधानमन्त्रीसँग बस्ने जानकारी दिए । ‘कार्यान्वयन नहुने हो भने, कार्यायोजना ल्याएको राजपत्रमा प्रकाशित गरेको के मतलव भयो ।’ उनले भने ‘त्यसैले प्रधानमन्त्रीलाई भेटेर सम्बन्धीत मन्त्रालय र विभागहरुलाई बोलाउन लगाएर हामी एउटा निर्णायक छलफल गछौं ।’ मन्त्री पाण्डेले अहिले भैरहवा अन्तर्राष्ट्रिय उडान गरिरहेका समर सेड्युल पनि निकाल्ने त्यसको लागि प्रक्रिया चलिरहेको जानकारी दिए।

नेपाल एयरलाइन्सको एउटा जहाज भैरहवामै राखेर चलाउने बारेमा पनि छलफल गरिरहेको भन्दै त्यसको लागि थप जहाजको आवश्यकता पर्ने पाण्डेले बताए। नेपाल एयरलाइन्सलाई प्रभावकारी बनाउने भन्ने भन्ने बारेमा छलफल भइरहेको भन्दै एयरलाइन्स प्रभावकारी भएमा मुलुकको उड्यन र पर्यटन क्षेत्र चलायमान हुने उनले दाबी गरे । ‘कम्बोडियामा सिधा उडान हुने हो भने ९० प्रतिसत भन्दा बढि बुद्धिष्ट लुम्बिनी आउन पाउँछन्। थाइल्याण्ड, अष्ट्रलियामा पनि आफ्नै जहाज चलाउन सकिन्थ्यो ।’ उनले भने ‘हिजो अर्थमन्त्री, अर्थ सचिव प्रधानमन्त्री कार्यालयका सचिव, प्रधानमन्त्रीका सल्लाहकार युवराज खतिवडा लगायतबीच हाम्रो छलफ भयो । नेपाल एयरलाईन्सको एउटा न्यारो बडी भैरहवा राख्ने हो भने त्यसैले चलायमान गराउँथ्यो भन्ने बारेमा छलफल भयो ।’ नेपाल एयरलाइन्सको आठ दस वटा वाइडबडी, त्यतीकै संख्यामा न्यारोबडी र ट्वीनेटर आजको आवश्यकता भएको भन्दै त्यसले सबै क्षेत्रलाई चलायमान गराउने मन्त्री पाण्डेले उल्लेख गरे।

भैरहवा र पोखरामा केही अन्तर्राष्ट्रय उडान हुँदा केही आशाको सञ्चार भएको भन्दै केही भएन भनेर निराशा नहुने उनले आग्रह गरे। कुनै पनि एयरपोर्ट बन्दा साथै गूलजार नहुने भन्दै चरण पार गर्दै जाने पाण्डेको भनाइ थियो। अन्तरक्रियामा गौतम बुद्ध अन्तर्राष्ट्रिय विमानस्थलका महाप्रबन्धक प्रतापबाबु तिवारीले भैरहवाको अन्तर्राष्ट्रिय उडानमा जजिरा र थाइ एयर एशियाले राम्रै यात्रु पाएको बताए । फ्लाई दुबइले पनि सुधार हुँदै गएको उनले उल्लेख गरे । भैरहवाबाट मार्च २० सम्म १३ हजार १८१ जनाले अन्तर्राष्ट्रिय उडान र अवतरण गरेको जानकारी दिए।

कार्यक्रममा नेपाल चेम्बर अफ कमर्श लुम्बिनीका अध्यक्ष टंक पोखरेलले सरकारले ल्याएको कार्यायोजना अनुसार श्रम स्विकृती, स्वास्थ्य जाँच लगायतका सुविधा रुपन्देहीमै हुनुपर्ने बताए । सिद्धार्थ होटल एशोसिएन सानका अध्यक्ष सिपी श्रेष्ठले छुटका हरेक कुरा कार्यान्वयन हुनुपर्ने बताए। नाट्टा लुम्बिनीका अध्यक्ष चन्द्र थापाले उडानको लागि अन्तरप्रदेश कनेक्टीभिटी पनि आवश्यक भएको उल्लेख गरे। सोट्टो लुम्बिनीका पूर्व अध्यक्ष सञ्जय बजिमयले नेपाल एयरलाइन्सले भैरवालाई पनि बेस बनाउनुपर्ने उल्लेख गरे। गौतम बुद्ध अन्तर्राष्ट्रिय विमानस्थल सञ्चालन नहुने हो भने निजी क्षेत्रको अर्बौ लगानी समेत खेर जाने व्यवसायीहरुको भनाइ थियो ।