आइतबारबाट गौतम बुद्ध विमानस्थलको अन्तर्राष्ट्रिय कक्ष रित्तो हुँदै

भैरहवा-भैरहवामा अन्तर्राष्ट्रिय उडान गरिरहेका जजिरा एयरवेज र फ्लाई दुबईले शनिवार यो सिजनको अन्तिम उडान गरेका छन्। अन्तिम उडान भरेर दुइवटै एयरलाइन्स भैरहवाबाट विदा भएका छन्। अर्को नियमित उडान कहिले हुन्छ टुंगो छैन।

अन्तिम उडानमा सनिवार जजिरा एयरवेजको उडानबाट १५६ जना भैरहवा आएका छन्। १६६ जना भैरहवाबाट कुवेत प्रस्थान गरेको विमानस्थलका सुचना अधिकारी विनोद सिंह रावतले जानकारी दिए। फ्लाई दुबईको जहाजबाट आएका ४२ जना भैरहवा झरेका छन्। ३७ जना भैरहवाबाट दुबई प्रस्थान गरेका छन्। जहाजमा १०७ जना काठमाडौंका यात्रु थिए।

गत कात्तिकदेखि जजिरा एयरवेजले भैरहवामा पुन नियमित उडान थालेको थियो। त्यस्तै फ्लाई दुबई, थाइ एयर एशिया र कतार एयरवेजले पनि गौतम बुद्ध अन्तर्राष्ट्रिय विमानस्थलमा उडान सुरु गरेका थिए। कतारको उडान पुसबाट रोकिएको थियो। थाई एयर एशियाले यही चैत्र ११ गते सोमबारसम्म उडान गरेको थियो। सातामा ३ पटक कुबेत भैरहवा कुवेत उडान गर्ने जजिरा र दुबई भैरहवा काठमाडौं दैनिक उडान गरेका फ्लाई दुबईले शनिवार यो विन्टर सिजनकै अन्तिम उडान गरेका हुन्।

अप्रिलबाट अक्टोवर सम्म हुने समर सेड्युलको लागि उनीहरुले नागरिक उड्यन प्राधिकरणसँग अनुमती लिएका छैनन्। त्यसैले अब उडान कहिले हुन्छ भन्ने टुंगो छैन। गौतम बुद्ध विमानस्थलको अन्तर्राष्ट्रिय कक्ष पनि पुन सुनसान हुँदैछ। उद्घाटन भएको साढे २ वर्षपछि नियमित अन्तर्राष्ट्रिय उडान हुँदा रुपन्देहीमा उत्साह छाएको थियो। अहिले पुन उडान रोकिँदा यहाँका व्यवसायीहरु चिन्तीत बनेका छन्।