पोखरा– पर्यटन व्यवसायी महिला सघं (टेवान ) पोखराले तनहुँको बन्दीपुरमा ‘गन्तव्य प्रवद्र्धन एवं परिचयात्मक’ कार्यक्रम गरेको छ। पोखराको पर्यटन प्रवद्र्धन एवं प्रचार गर्ने उद्धेश्यले बन्दीपुरमा स्थानिय सरकार र पर्यटनसँग सम्वद्ध विभिन्न सघंसस्थाहरुसँग प्रवद्र्धनात्मक कार्यक्रम गरेको हो।
पोखराबाट गएको टोलीलाई स्वागत गर्दै बन्दीपुर गाउँपालिका उपाध्यक्ष पञ्चमाया गुरुङले आफ्नो ठाउँको धार्मिक एवं पर्यटकीय स्थलहरुको भ्रमणसङै अवलोकन गरिदिन आग्रह गरिन्। उनले पर्यटन क्षेत्रको विकास र आपसी सिकाईका विषयमा दुई शहरका व्यवसायीहरु हातेमालो गरेर एकाअपसमा मिलेर जानसके पर्यटन क्षेत्रलाई थप अगाडि बढाउन सकिने बताइन्। बन्दीपुरको पर्यटन प्रवद्धन गर्ने उद्धेश्यले बन्दीपुर भ्रमण वर्ष २०२५ संचालन गरिएको जानकारी दिदै गुरुङले पर्यटकको बसाई लम्याउन स्थानिय सरकार र निजी क्षेत्र मिलेर विभिन्न कार्यक्रमहरु संचालन गरिएको सुनाइन्।
बन्दीपुर भ्रमण वर्ष २०२५ का सम्योजक वैंश बहादुर गुरुङले २०औ वर्ष अघि गरिएको परिकल्पनालाई महसुस गरेर गाउपालिकाले भ्रमण वर्ष घोषणा गरेको बताउदै भ्रमण वर्ष सफल बनाउन आफुहरु लागिपरेको बताए। उनले भ्रमण वर्षको टिम, विभिन्न सघंसस्था र स्थानिय सरकार एकजुट भएर बन्दीपुरलाई देश बिदेशमा चिनाउन लागिपरेको सुनाए। गुरुङले सबैले छोडेर गएपछि रित्तिएको बन्दीपुरलाई पर्यटकीय बन्दीपुर बनाउन अग्रजहरुले गरेको योगदानको बारेमा चर्चा गरेका थिए।
आयोजक टेवानका अध्यक्ष कमला गिरीले सघंले पर्यटकीय गन्तव्य प्रवद्र्धन (डेस्टीनेशन प्रमोसन) गर्ने क्रममा यो पटक बन्दीपुरलाई रोजेको बताइन्। पोखरा प्रकृतिले सजिएको तालै तालको सहर भए जस्तै बन्दीपुरको पनि छुट्टै महत्व रहेको उनको भनाई थियो। हालै पोखरालाई भ्रमण वर्ष २०२५ घोषणा गरिएको बताउदै गिरीले बन्दीपुरबासीलाई पोखरा घुम्न निम्तो दिइन्। उनले बन्दीपुर भ्रमण वर्ष २०२५ को सफलताको शुभकामना समेत ब्यक्त गरिन्। दुबै सहरमा भ्रमण वर्ष मनाईरहदा व्यवसायीहरु मिलेर पर्यटन क्षेत्रलाई थप अगाडि बढाउन सकिने कुरामा टेवान अध्यक्ष गिरीले जोड दिइन्।
नेपाल उद्योग तथा व्यवसायी महासघं गण्डकी अध्यक्ष बबरजङ गुरुङले पर्यटन क्षेत्रको विकास र प्रवद्र्धनका लागि मिलेर अघि बढ्नु पर्नेमा जोड दिए। उनले पोखराका पर्यटन व्यवसायीहरुसङ सहकार्य गरेर अघि बढ्न सके बन्दीपुरमा भारतिय पर्यटकलाई अधिक मात्रामा भित्र्याउन सकिने बताए। पर्यटन प्रवद्र्धनमा स्थानीय सरकारले बजेट छुट्याउदा महिला ब्यवसायीलाई छुट्टै बजेटको ब्यवस्था गर्न उनले आग्रह गरे।
बन्दीपुर भ्रमण वर्ष २०२५ का सहसम्योजक लिक बहादुर बानिया, सचिवालय सचिव विक्रम पिया, होमस्टे महासघं बन्दीपुरका अध्यक्ष गिता लम्साललगायतले पाहाडकी रानी बन्दीपुर प्रचार प्रसारको अभावमा ओझेलमा परेको बताउदै बन्दीपुरको प्रवद्र्धन गर्न भ्रमण वर्ष कोसेढुङ्गा साबित हुने विश्वास ब्यक्त गरेका थिए।
आयोजक सघं टेवान सदस्य एवं कार्यक्रम संयोजक सारदा लम्सालले १८ सदस्यीय प्रवद्र्धनात्मक टोलीले पर्यटन प्रवद्धनात्मका कार्यक्रम अन्तरगत दुई शहरका पर्यटन व्यवसायीबीच अनुभव आदान प्रदान गर्नुका साथै बन्दीपुरमा रहेका धार्मिक एवं पर्यटकीक गन्तव्यहरुको भ्रमण गर्नुका साथै बन्दीपुर केवलकारको अवलोकन समेत गरिएको जानकारी दिइन्।
नेपाल पर्यटन बोर्ड गण्डकी प्रदेशको प्रवद्धन एवं बन्दीपुर भ्रमण वर्ष २०२५ को सहकार्यमा गरिएको कार्यक्रममा टेवानका महासचिव अनिता खड्का भट्टराईले सस्थाका बारेमा प्रकाश पारेकी थिइन्। बन्दीपुर तर्फ गएको टोलीले पर्यटनका सम्भावना तथा चुनौतीलाई स्थलगत रूपमा अध्ययन एवं अवलोकन गरेको थियो।
