लुम्बिनी बुद्ध जन्मस्थल लुम्बिनीमा गत मार्च महिनामा २२ हजार २५० विदेशी पर्यटक आएका छन्। यो छिमेकी मुलुक भारत बाहेकको तथ्यांक हो। कोभिड एकै महिनामा यती धेरै तेस्रो मुलुकका पर्यटकले लुम्बिनी भ्रमण गरेका हुन्। लुम्बिनी भ्रमण गर्ने विदेशी पर्यटकमा सबै भन्दा बढि श्रीलंकाका छन्।
गत मार्चमा ८ हजार १६६ श्रीलंकनले लुम्बिनीको भ्रमण गरेका छन्। थाइल्याण्डबाट ४ हजार २०२ जना लुम्बिनी आएका छन्। म्यानमारबाट ३ हजार ४०८, चिनबाट १ हजार ३०४ र भियतनामबाट १ हजार ५८ जनाले भ्रमण गरेको लुम्बिनी विकास कोषले जनाएको छ। मार्च महिनामा लुम्बिनीमा अल्पकालिन भिक्षुहरुको प्रवज्या कार्यक्रम, अन्तर्राष्ट्रिय त्रिपिटक पाठ समारोह, अन्तर्राष्ट्रिय शान्ति तथा ध्यान महोत्सव लगायतका कार्यक्रम भए। जसका कारण विदेशी पर्यटकको चहलपहल बढेको हो।
गत महिना छिमेकी मुलुक भारतबाट ३४ हजार ९६३ जना लुम्बिनी आएका छन्। यो अघिल्लो वर्ष सोहि अवधिको तुलनामा झण्डै ५ हजारले बढि हो। मार्च महिनामा नेपाल भित्रैबाट ५० हजार ३५४ जना लुम्बिनी घुम्न आएका छन्। यो अघिल्लो वर्षको सोही अवधिको तुलनामा झण्डै साढे ११ हजारले कम हो। २०२४ को मार्चमा ६१ हजार ८४३ आन्तरिक पर्यटक लुम्बिनी आएका थिए। लुम्बिनीमा कोभिड पछि आन्तरिक पर्यटकको आगामनमा सुधार हुन सकेको छैन। कोभिड अघि मार्च महिनामा एक लाखको आसपासमा नेपाल भित्रबाट लुम्बिनी घुम्न आउने गरेका थिए।
