‘हामी बुद्ध जन्मस्थलमा मात्र नभई बुद्धदर्शनको मुहानमा छौं’

लुम्बिनी प्रधानमन्त्री केपी ओलीले लुम्बिनी बुद्ध जन्मस्थल मात्र नभई बुद्ध दर्शनको मुहानमा रहेको बताएका छन्। उनले बुद्ध दर्शनको उद्गम स्थल समेत लुम्बिनी हो भनेर आँफूले अन्तराष्ट्रिय फोरममा पनि भनेको उनले सुनाए। शुक्रबार लुम्बिनी बौद्ध विश्वविद्यालयको २० औं बार्षिकउत्सव तथा तेस्रो दीक्षान्त सभामा बोल्दै विश्वविद्यालयका कुलपतिसमेत रहेका प्रधानमन्त्री ओलीले बुद्धिजमको मुहान पवित्र स्थल लुम्बिनीको संरक्षण र विकासमा सरकार लागिरहेको जानकारी दिए।

ओलीले लुम्बिनीलाई मानिसले मात्र नभई जिवजन्तु समेत रमाउन सक्ने बँगैचामय बनाउनुपर्ने उल्लेख गरे। ‘हामीले यस ठाउँलाई साँच्चीकैको एउटा बगैंचामय, सुन्दर जिवनमय, प्रकृतिमय बनाउनुपर्दछ र लुम्बिनी मान्छेहरुको मात्र होइन कि चराचुरुंगी किरा फट्यांग्राले पनि लुम्बिनी सम्झिउन्।’ उनले भने ‘पुतलीले पनि लुम्बिनी सम्झिउन, यहाँ आएपछि मौरीले पनि लुम्बिनी सम्झिउनकी त्यहाँ गएर फुलको रस लिन पाइन्छ त्यहाँ गएर फल खान पाइन्छ भनेर।’ प्रधानमन्त्री ओलीले केन्जो टाँगेको गुरुयोजना अनुसार नै लुम्बिनीलाई सुन्दर बनाउने गरि अघि बढेको बताए।

आफू पहिलो पटक प्रधानमन्त्री हुँदा बुद्धजयन्तीको कार्यक्रम हावापानीले विथोलिएकै कारण अहिले सुविधा सम्पन्न अन्तर्राष्ट्रिय स्त्तरको सभाहलको निर्माण भएको स्मरण गर्दै ओलीले कुनै पनि समस्या आयो भन्दैमा त्यसबाट भाग्न नहुने बताए।

यसैबीच लुम्बिनी बौद्ध विश्वविद्यालयले भिक्षुणी धम्मावती गुरुमालाई मानार्थ विद्यावारिधि प्रदान गरेको छ। ललितपुर वडा नम्बर ६ पकुहवामा जन्मिएर ९१ वर्षीय गुरूमा धम्मावतीले बौद्ध धर्म, दर्शन र शिक्षाको विकासमा दिएको अतुलनीय योगदानप्रति सम्मान गर्दै मानार्थ विद्यावारिधिको उपाधि प्रदान गरिएको विश्वविद्यालयका रजिस्ट्रार तिलकराम आचार्यले जानकारी दिए। विश्वविद्यालयका कुल पति समेत रहेको प्रधानमन्त्री ओलीले धम्मवती गुरुमासँगै विभिन्न संकायमा उपाधिप्राप्त दुई सय ८९ जनालाई दीक्षित गरेका हुन्। तीमध्ये पाँच जनालाई विद्यावारिधिको उपाधि प्रदान गरेका हुन्।