“सबै श्रीलंकनलाई लुम्बिनीसहितका अरु बुद्धस्थल घुम्न आग्रह गर्छौं”
लुम्बिनी– श्रीलंकाका सञ्चारकर्मीको टोलीले बुद्ध जन्मस्थल लुम्बिनी र कपिलबस्तुको भ्रमण गरेका छन्। २६ जना बरिष्ठ पत्रकारहरुको टोलीले आज लुम्बिनीसँगै कपिलबस्तुको तिलौराकाट, कुदान, गोटिहवाको भ्रमण गरेका हुन । टोलीलाई लुम्बिनी विकास कोषले स्वागत गर्दै लुम्बिनी सहित बुद्धस्थलहरुको बारेमा जानकारी गराएको थियो।
सो अवसरमा लुम्बिनी विकास कोषका कोषध्यक्ष सिद्दिचरण भट्टराईले सञ्चारकर्मीहरुको यो भ्रमणले लुम्बिनीको प्रचार प्रसार र प्रवद्र्धनमा ठूलो सघाउ पुग्ने उल्लेख गरे। उनले लुम्बिनीमा बुद्धिष्ट मुलुकहरुको मिडिया सम्मेलन राख्ने सोच भइरहेको बताए। भट्टराईले आफू पनि पत्रकारीताकै पृष्ठभूमिबाट आएकोले कलमको मुल्य राम्रोसँग थाह भएको भनाइ राखे।
कोषका सदस्य सचिव सानुराजा शाक्यले नेपाल र श्रीलंकाको सम्बन्ध ऐतिहासिक सम्बन्ध रहेको बताए। लुम्बिनी र बुद्ध दर्शनले दुई देशबीचको सम्बधलाई झन नजिक बनाएको भन्दै उनको भनाइ छ।
कोषका प्रशासकिय अधिकृत ज्ञानिन राइले लुम्बिनी जस्तै बुद्धले २९ वर्ष विताएको कपिलबस्तुको तिलौराकोट पनि महत्वपूर्ण ठाउँ रहेको बताए। तिलौराकोट विश्व सम्पदा सूचीमा सुचिकृत हुने प्रक्रियामा रहेको उनले जानकारी दिए।
कोषका सुचना अधिकृत डा. हरिध्वज राइले कपिलवस्तुको तिलौराकोट नै बुद्धका पिता शुद्धोधनको दरबार रहेको थुप्रै आधारले पुस्टी भएको भन्दै भ्रममा नपर्न आग्रह गरे। ३ वटा बुद्धको जन्मस्थल यही क्षेत्र रहेको भन्दै उनले लुम्बिनी सहित बृहत लुम्बिनी क्षेत्रको भ्रमण गर्नुपर्ने उल्लेख गरे।
भ्रमण टोलीका संयोजक एशिया मिडिया कल्चरल एशोसिएन (अम्का)का अध्यक्ष उपुल जानका जयसिंङेले बुद्धस्थलको भ्रमण निकै जानकारी मुलक र उपलब्धी मुलक रहेको बताए। सबै श्रीलंकनलाई लुम्बिनीसँगै कपिलबस्तु रामग्राम लगायतका बुद्धस्थल भ्रमण गर्न आग्रह गर्ने उनले जानकारी दिए।
श्रीलंकन सञ्चारकर्मीको टोली भारतका पनि बुद्धिष्ट साइट घुम्दै लुम्बिनी र कपिलबस्तु आइपुगेको एशिया मिडिया कल्चरल एशोसिएनकि नेपाल प्रतिनिधि सम्झना पौडेलले जानकारी दिइन्। अग्रज मिडियाकर्मीसँगै पूर्व सांसद, बुद्धिजमका प्राध्यापकहरु पनि भ्रमण टोलीमा सहभागी थिए।
