भैरहवा -भैरहवाबाट अन्तर्राष्ट्रिय उडान गर्दै आएको फ्लाई दुबईले पुस महिनामा उडान रोक्ने भएको छ। जजिरा एयरवेज र थाइएयर एशियाले भने उडान निरन्तर गर्ने भएका छन्। गौतमबुद्ध अन्तर्राष्ट्रिय विमानस्थलमा नियमित उडान तीन वायुसेवा कम्पनीले मौसमको कारण देखाएर उडान नगर्ने भन्दै नेपाल नागरिक उड्यन प्राधिकरणलाई पत्राचार गरेका थिए। त्यसपछि प्राधिकरणका महानिर्देशक प्रदीप अधिकारीले सोमबार छलफलमा बोलाएका थिए।

छलफलपछि थाई एयर एसिया र जजिरा एयरवेजले भैरहवाका लागि निरन्तर नियमित उडान गर्ने सहमति भएको छ। फ्लाई दुबईले डिसेम्बर १६ देखी जनवरी १३ सम्म अर्थात पुस महिनाभर मात्र उडान स्थगन गर्ने बताएको महानिर्देशक अधिकारीले जानकारी दिए। थाई एयर एसियाले प्रत्येक साता गरिरहेको तीन उडानमा एक कटौती गरी दुई निरन्तर गर्ने र सकेसम्म अर्को उडान सञ्चालन गर्ने प्रयास जारी रहने बताएको अधिकारीको भनाइ छ।

फ्लाई दुबईइले जनवरी १४ देखि भैरहवाका लागि टिकट बुकिङ सिस्टममा राखिसकेको छ। जाडो मौसम सुरु भएपछि बाक्लो हुस्सुका कारण पछिल्लो समय भैरहवा विमानस्थलको भिजिबिलिटी १ हजार २ सय मिटरसम्म हुने गरेको छ। ठूला जहाजका लागि कम्तीमा १ हजार ८ सय मिटर भिजिबिलिटी चाहिन्छ।