बुटवल – बुद्ध जन्मस्थल लुम्बिनी र पाल्पाको विचमा बुटवल शहर पर्दछ। पाल्पासहित पोखरा, मुक्तीनाथ जाने धेरै जसो पर्यटकहरु बुटवल भएर जाने गर्दछन्। त्यस्तै गुल्मीको रिडी, रेसुंगा, अर्घाखाँचीको सुपादेउराली, अर्घा लगायतका ठाउँमा यहाँबाट सहज रुपमा जान सकिन्छ। पर्यटकको बसाइको लागि बुटवलमा स्तरियदेखी तारे होटलहरु छन्। बुटवल र आसपासमा थुप्रै पर्यटकीय गन्तव्यहरु छन्। यहाँका गन्तव्य र अन्य जिल्लाका महत्वपूर्ण गन्तव्यहरुलाई जोड्न सकेमा बुटवलमा पर्यटकीय गतिविधि बढाउन सकिन्छ।
पर्यटकीय गतिविधि र चहलपहल बढाउन बुटवल र लुम्बिनी प्रदेशका विभिन्न ठाउँलाई समेट्ने गरि टुर प्याकेज बनाउनुपर्छ।
बुटवल उद्योग बाणिज्य संघ अन्तर्गत टुर एण्ड ट्राभल बस्तुगत समितिका सभापति तथा नट्टा लुम्बिनीका उपाध्यक्ष अन्जन श्रेष्ठले बुटवललाई जोडेर विभिन्न प्याकेजहरु बन्न सक्ने बताए। ‘बुटवल आएका पर्यटकले पहिलो दिन जितगढी किल्ला, फूलबारी, नुवाकोट लगायतका ठाउँ घुम्न सक्छन्। सोही रात बुटवलमा बास बसेर भोली पल्ट लुम्बिनी जानेछन्।’ उनले भने ‘यो एक रात दुई दिनको प्याकेज हो।’ पहिलो दिन बुटवल, दोस्रो दिन लुम्बिनी र तेस्रो दिन कपिलबस्तुका बुद्धस्थल घुम्ने गरि दुई रात ३ दिनको प्याकेज पनि बन्ने श्रेष्ठले बताए।
संघको बस्तुगत समितिका उपसभापति तथा नाट्टा लुम्बिनीका सदस्य बरुण ज्ञवालीले लुम्बिनीबाट बुटवल सहितको प्याकेज सुरु गर्न सकिने उल्लेख गरे। ‘पहिलो दिन लुम्बिनी घुमेर साँझ बुटवल आएर बस्ने। अर्को दिन जितगढी गएर केबलकार या हाइकिङ मार्फत नुवाकोट बसन्तपुर जान सकिन्छ। सोही दिन बुटवलका अरु ठाउँ घुमेर भोली पल्ट पाल्पा जान सकिन्छ।’ उनले भने ‘लुम्बिनी, बुटवल र पाल्पा घुम्ने गरि दुई रात ३ दिनको राम्रो प्याकेज बन्छ।’
दुई रात ३ दिनको यो प्याकेजको लागि प्रतिव्यक्ती ८ देखी १० हजार रुपैया लाग्ने ज्ञवालीको भनाइ छ । प्याकेजमा स्तरिय होटलको बसाइ, यातायात, खाना नास्ता समेटिने उनले बताए।
दुई रात ३ दिनको अन्य प्याकेजमा बुटवल र लुम्बिनी सहितका गन्तव्य घुम्न सकिन्छ। पहिलो दिन बुटवलका पर्यटकीय स्थल घुम्ने, अर्को दिन रामग्राम, देवदह हुँदै लुम्बिनी पुग्न सकिन्छ। सोही रात लुम्बिनीमा बास बसी अर्को दिन कपिलबस्तुका बुद्धस्थलहरु घुम्ने गरि प्याकेज बनाउन सकिन्छ। यस्तै बुटवलले लुम्बिनीलाई पोखरा, मुक्तिनाथ, बर्दिया र चितवनसँग जोडेर पनि प्याकेज बनाउन सक्छ।
पछिल्लो समय बेलहिया नाका हुँदै भारतीय पर्यटकहरु आउने क्रम बढेको छ। केही मात्रामा तेस्रो मुलुकका पर्यटक पनि आउने गरेका छन्। आन्तरिक, भारतीय र तेस्रो मुलुकका पर्यटकलाई प्याकेज बनाएर व्यवस्थित तरिकाले घुमाउन सकेमा बुटवलमा पर्यटकीय गतिविधि बढ्ने, घुम्न आउनेहरुको बसाइ पनि लम्बिने र उनीहरुलाई यहाँका गन्तव्य बारे बढि जानकारी हुने गर्दछ।
एक रात दुई दिने प्याकेज
- पहिलो दिन बुटवलका ठाउँहरु घुम्ने, दोस्रो दिन लुम्बिनी जाने
- पहिलो दिन लुम्बिनी घुमेर बेलुका बुटवल आउने, दोस्रो दिन बुटवलका गन्तव्य घुम्ने
दुई रात तिन दिने प्याकेज
- पहिलो दिन बुटवलका गन्तव्य घुम्ने, दोस्रो दिन विहान देवदह, रामग्राम, हुँदै लुम्बिनी जाने, तेस्रो दिन कपिलबस्तुका ठाउँ घुम्ने
- पहिलो दिन लुम्बिनी घुम्ने बेलुका बुटवल आउने, दोस्रा दिन बुटवलका गन्तव्य घुम्ने, तेस्रो दिन पाल्पा जाने
तीन रात चारदिने प्याकेज
- पहिलो दिन लुम्बिनी घुमेर बुटवल आउने, दोस्रो दिन बुटवलका गन्तव्य घुम्ने, तेस्रो दिन तान्सेन र रानीमहल घुम्ने, चौथो दिन भैरवस्थान, रिडी र रेसुंगा पुग्ने
- पहिलो दिन बुटवल घुम्ने, दोस्रो दिन लुम्बिनी र कपिलबस्तु, तेस्रो दिन सुपा देउराली र अर्घा घुम्ने, चौथो दिन गुल्मीको रेसुंगा हुँदै रुरु जाने
