आन्तरिक पर्यटक निराशाजनक, भारतीय आगमनको नयाँ रेकर्ड, विदेशी पर्यटकमा सुधार

लुम्बिनी -सन् २०२४ मा ११ लाख ७५ हजार ३०४ जनाले बुद्ध जन्मस्थल लुम्बिनीको भ्रमण गरेका छन्। अघिल्लो वर्षको तुलनामा यो १ लाख ७३ हजार ३६६ ले बढि हो।

सन २०२३ मा ९ लाख ९८ हजार ९३८ जना लुम्बिनी आएका थिए। कोभिड पछि पहिलो पटक लुम्बिनी घुम्ने आन्तरिक र बाह्य पर्यटकको संख्या १० लाख नाघेको हो। कोभिड अघि सन २०१९ मा कुल १५ लाख ५८ हजार ३२६ जना बुद्ध जन्मस्थल घुम्न आएका थिए।

सन् २०२४ मा लुम्बिनी आएका मध्ये ७ लाख ५९ हजार ९९० जना आन्तरिक पर्यटक रहेको लुम्बिनी विकास कोषले जनाएको छ। अघिल्लो वर्षको तुलनामा आन्तरिक पर्यटक १५.८१ प्रतिसतले बढेको भएपनि कोभिड अघिको तुलनामा निराशाजनक हो। कोभिड अघि २०१७ मा साढे १२ लाखले लुम्बिनी घुमेका थिए। २०१८ र ०१९ दुबै वर्ष साढे ११ लाखका दरले आन्तरिक पर्यटक लुम्बिनी आएका थिए।

भारतीय पर्यटक आगमनले भने नयाँ रेकड कायम गरेको छ। गत वर्ष ३ लाख ८८९ भारतीयले लुम्बिनी भ्रमण गरेका छन्। २०२३ मा २ लाख ६६ हजार ५१० भारतीय आएका थिए। कोभिड अघि २०१९ मा २ लाख ६ हजार १७१ जना आए पनि त्यस अघिका वर्ष भारतीय पर्यटकको आगमन २ लाख भन्दा कम नै थियो ।

२०२४ मा १ लाख १४ हजार ४२५ जना तेस्रो मुलुकका पर्यटक बुद्ध जन्मस्थलमा आएको लुम्बिनी विकास कोषले जनाएको छ। तेस्रो मुलुकका पर्यटकको आगमन ४६.३६ प्रतिसतले बढ्दा सुधार देखिएको छ । २०२३ मा ७६ हजार २१० राहादानी वाहक विदेशी पर्यटक लुम्बिनी आएका थिए। कोभिड अघि २०१९ मा १ लाख ७४ हजार १५ जना तेस्रो मुलुकका पर्यटक लुम्बिनी आएका थिए।

२०२४ मा लुम्बिनी आउने तेस्रो मुलुकका पर्यटकमा सबै भन्दा बढि श्रीलंकाका पर्यटक रहेका छन्। गत वर्ष २३ हजार ५६९ श्रीलंकन आएको कोषले जनाएको छ। त्यस्तै थाइल्याण्डबाट २१ हजार ४९६, चिनबाट १३ हजार १२ जना लुम्बिनी आएका छन्। त्यस्तै म्यानमारबाट १० हजार ५१७, भियतनामबाट ८ हजार ५०० र दक्षिण कोरियाबाट ४ हजार ६४६ जना आएको लुम्बिनी विकास कोषले जनाएको छ ।