काठमाडौं -अन्नपूर्ण पदमार्गमा सन् २०२४ मा करिब ३१ हजार पर्यटकले भ्रमण गरेका छन्। विश्वकै उत्कृष्ठ १०औँ गन्तव्यमा पर्ने योे पदमार्गमा १८ हजार चार सय ९९ पुरुष, १२ हजार तीन सय ६२ महिला र पाँच अन्य व्यक्ति गरी ३० हजार आठ सय ६६ विदेशी पर्यटक पुगेका हुन्।
जस मध्ये सार्क राष्ट्रका १ हजार ८५४ जना पर्यटक पुगेका छन्। अन्य देशबाट २९ हजार ७ जना रहेका अन्नपूर्ण संरक्षण क्षेत्र आयोजना (एक्याप) पर्यटक जाँच तथा सूचना केन्द्र धारापानीका इन्चार्ज भूपेन्द्र गुरुङले जानकारी दिए।
पदमार्गको यात्रा गर्नेमा धेरै जसो फ्रान्स, इजरायल, जर्मनी, बेलायतलगायत देशका पर्यटक हुने गरेको केन्द्रका इन्चार्ज गुरुङले बताए।
कोरोना महामारीले थला परेको यो क्षेत्रमा केही वर्षदेखि क्रमशः पर्यटक बर्सेनि बढ्दै गएका छन्। सन् २०२३ को तुलनामा सन् २०२४ मा नौ हजार ६ सय १९ बढी विदेशी पर्यटक पुगेका थिए। सन् २०२३ मा २१ हजार दुई सय ४७ विदेशी पर्यटक पुगेका थिए । केन्द्रका इन्चार्ज गुरुङका अनुसार सन् २०२३ मा एक सय २२ देशका नागरिक पदमार्गमा पुगेका थिए ।
त्यस्तै, सन् २०२२ मा १५ हजार नौ सय विदेशी पर्यटक अन्नपूण पदयात्राको लागि आएका थिए। २०२२ को तुलनामा २०२३ मा पाँच हजार तीन सय ४७ विदेशी पर्यटक बढेका थिए। २०२१ मा दुई हजार दुई सय ७३, जना २०२० मा एक हजार नौ सय ७६ पर्यटक पुगेका थिए । कोभिड अघि सन् २०१९ मा ३६ हजार ६ सय ४७ पर्यटकले अन्नपूर्ण पदमार्गको भ्रमण गरेको पर्यटक जाँच तथा सूचना केन्द्रले जनाएको छ।
अन्नपूर्ण पदमार्गको प्रवेशद्वार लमजुङ बेँसीशहर नगरपालिका–७ मनाङे चौतारा हो। यस पदमार्गमा लमजुङ, मनाङ, कास्की, मुस्ताङ र म्याग्दी जिल्ला जोडिएका छन्। पर्यटकहरु हिमाली, पहाडका दृश्य, उच्च पहाड, मनाङवासीको रीतिरिवाज, प्राकृतिक सुन्दरता हेर्नलाई साथै मनाङबाट थुम्रापास गरी मुस्ताङ भइ पोखरा जानका लागि अन्नपूर्ण पदमार्गमा पर्यटकहरु पुग्ने गर्छन्। साथै, मनाङमा रहेको विभिन्न हिमाल चढ्न, संसारकै अग्लो स्थानमा रहेको तिलिचो ताललगायत हेर्नका लागि पनि पर्यटक त्यहाँ पुग्ने गरेका छन्।
