काठमाडौं – नेपाल वायुसेवा निगममा देखिएका समस्या अध्ययन गरि सुधारका उपायबारे सुझाब दिन उपसमिति गठन भएको छ। संसदको अन्तर्राष्ट्रिय सम्बन्ध र पर्यटन समितिको बिहीबार सिंहदरबारमा बसेको बैठकले रास्वपा सांसद शिशिर खनालको संयोजकत्वमा ४ सदस्यीय उपसमिति गठन गरेको हो। उपसमितिमा खनालसहित छिरिङ ल्हामु लामा, योगश गौचन थकाली, सुनिता बराल छन्। निगमको अध्ययन गरि एक महिनाभित्र समितिलाई प्रतिवेदन पेश गर्न उपसमितीलाई भनिएको छ।
समितिका निर्णयहरुबारे जानकारी गराउँदै समिति सभापति राजकिशोर यादवले नेपाल वायुसेवा निगम अध्ययन समितिले एक महिना भित्रमा प्रतिवेदन पेश गर्नेछ। क्यानको बारेमा पनि आगामी बैठकबाट उपसमिति बनाएर जाने सभापति यादवले बताए ।
समितिले संस्कृति, पर्यटन र नागरिक उड्डयन गरी तीन क्षेत्रकै वृहत्तर विकासका लागि मन्त्रालयको समग्र नीतिगत, संरचनागत र व्यवस्थापकीय सुधार गर्न कार्यान्वयनयोग्य कार्ययोजना यथाशिघ्र निर्माण गरी सोको जानकारी समितिलाई गराउन निर्देशन दिएको छ। विविध जाति, भाषा, धर्म र सांस्कृतिक सम्पदाहरुको संरक्षण गर्न नेपालमा जातिय र धार्मिक संग्रहालयहरुको निर्माण कार्यलाई तीव्रता दिइ पर्यटन प्रवद्र्धनमा जोड दिन निर्देशन दिएको छ ।
समितिले नेपाल वायुसेवा निगमको व्यवसायिक योजनालाई पूर्ण रुपमा कार्यान्वयनमा ल्याइ सोको प्रगति समय समयमा समितिमा पेश गर्न र राष्ट्रिय महत्व, सुरक्षा र आर्थिक विकासका दृष्टिबाट अति आवश्यक निर्माणाधिन निजगढ अन्तर्राष्ट्रिय विमानस्थलको निर्माण कार्यलाई शिघ्र अघि बढाउन नेपाल सरकार र संस्कृति, पर्यटन तथा नागरिक उड्डयन मन्त्रालयलाई निर्देशन दिएको छ।
