बुटवल – बुटवलमा साेमबाबाट खाना महोत्सव तथा माघे सक्रान्ति मेला २०८१ शुरु भएको छ। ‘नेपाली मौलिक संस्कृति र स्थानिय खानाका परिकारको हाम्रो शान, शहरदेखि गाउँसम्मको पर्यटन प्रवद्र्धन र विकास हाम्रो अभियान’ भन्ने नारा सहित होटल तथा रेष्टुरेन्ट व्यवसायी संघ रूपन्देहीको आयोजनामा महाेत्सव सुरू भएकाे हाे।
महाेत्सवकाे लागि बुटवल उपमहानगरपालिका र पर्यटन विकास परिषद लुम्विनीले सहयोग गरेका छन्।
सिद्धेश्वर माध्यमिक बिद्यालयको मैदानमा जारी महाेत्सव माघ २ गतेसम्म चल्नेछ। खाना महोत्सवको उद्घाटन गर्दै नेपाल होटल तथा रेष्टुरेन्ट महासंघका केन्द्रीय अध्यक्ष दिनेश कुमार चुकेले होटल ब्यवसाय पर्यटन क्षेत्रमा योगदान दिने उद्योगका रुपमा रहेको बताए। उनले पर्यटन क्षेत्रमा सरकारको लगानीसंगै पर्यटन ब्यवसायीहरु पर्यटन उत्पादनका विषयमा जोड दिन आवश्यक रहेको उल्लेख गरे।
संघका अध्यक्ष लेखनाथ भण्डारीले लुम्बिनी प्रदेश विश्वमा नै पर्यटनको उत्कृष्ट गन्त्ब्य भएको दाबी गर्दै यहाका ब्यवसायीहरुलाई संस्थागत रुपमा एकतावद्ध गर्दै आफुहरु पर्यटन प्रवद्र्धनको योजनामा लागेको बताए। प्रत्येक वर्ष अग्रेजी नया वर्षमा सडक महोत्सव गर्दै आएका रुपन्देहीका होटल ब्यवसायीहरुले यस वर्ष भने माघि पर्वलाई विशेष प्रचारप्रचार गर्ने गरि कार्यक्रम गरेको बताए।
महोत्सवमा स्थानीय थारू, मगर, नेवार र अन्य समुदायका परम्परागत खानाका परिकारकोे प्रदर्शनी र विक्री गरिने उनले बताए। यसैगरि थारू नाच, लोकदोहोरी र विभिन्न जातजातिका मौलिक र सांस्कृतिक नृत्यहरुका साथै पर्यटन प्रवद्र्धन हुने लुम्बिनी प्रदेशका प्रमुख पर्यटकीय गन्तव्यहरूको जानकारी दिने स्टलहरु रहेको संघका वरिष्ठ उपाध्यक्ष माधव खनालले जानकारी दिए।
कार्यक्रममा पर्यटन विकास परिषद लुम्बिनीका कार्यकारी निर्देशक रामु जोशी, नेपाल पत्रकार महासंघका अध्यक्ष दिनेश पाण्डे, नेकपा एमालेका जिल्ला अध्यक्ष यज्ञ गैरे, वडा वडाअध्यक्ष नरिश्वर पौडेल, महासचिव अर्जुन थापाले खाना महोत्सव र मेला संचालनबाट हुने फाईदाबारे प्रकाश पारेका थिए।
