यी हुन नाट्टा लुम्बिनीका आगामी योजना
बुटवल -नेपाल एशोसिएन अफ टुर एण्ड ट्राभल एजेन्ट्स नाट्टा लुम्बिनीले भैरहवाको गौतम बुद्ध अन्तर्राष्ट्रिय विमानस्थललाई विदेश प्रस्थान र आगमनको प्रमुख प्रवेश विन्दु बनाउन जागरुकता कार्यक्रम सञ्चालन गर्ने भएको छ। नाट्टा लुम्बिनीको हालै सम्पन्न प्लानिङ वर्कसप तथा फेलोसिप कार्यक्रमले भैरहवाबाट अन्तर्राष्ट्रिय उडानको निरन्तरतालाई ध्यानमा राखेर पर्यटकीय कार्यक्रम गर्ने निर्णय गरि वर्षभरीका कार्यक्रमको सूची तयार गरेको हो।
नाट्टाको प्लानिङ वर्कसपले अन्तर्राष्ट्रिय विमानस्थलको दिगो सञ्चालन र प्रदेशको पर्यटन प्रवद्र्धनको लागि मुलुक भित्र र मुलुक बाहिर समेत कार्यक्रम गर्ने निर्णय गरेको छ । जस अन्तर्गत सरकारसँग समन्वय र पहल गरि बुद्धिष्ट कन्ट्री फाम ट्रिप एण्ड विजनेश प्रमोसन कार्यक्रम आयोजना गरिने नाट्टा लुम्बिनीका अध्यक्ष चन्द्र थापाले जानकारी दिए। ‘अन्तर्राष्ट्रिय विमानस्थल र लुम्बिनी प्रदेशको पर्यटन प्रवद्र्धन र प्रचारप्रसारको लागि बुद्धिष्ट देशहरुमा फाम ट्रिप गर्न लागेका हौं।’ उनले भने।
यस्तै लुम्बिनीमा इन्टरनेश्नल ट्राभल मार्टका लागि पहल गर्ने नाट्टा लुम्बिनीले निर्णय गरेको छ। भारतीय पर्यटन व्यवसायी तथा सञ्चारकर्मीहरुलाई आमन्त्रण गरि लुम्बिनी प्रदेशका पर्यटकीय गन्तव्यहरुको प्रचार प्रसार गर्ने कार्यक्रम पनि वर्कसपले तय गरेको छ। त्यस्तै अन्तरप्रदेश हवाइ तथा सडक कनेक्टीभिटी राउण्ड टेबल अन्तरक्रिया गर्ने, पर्यटनसँग पत्रकार कार्यक्रम सञ्चालन गर्ने लगायतका निर्णय गरिएको अध्यक्ष थापाले जानकारी दिए।
डण्डा चलाएर मात्र विदेशी एयरलाइन्सलाई काठमाडौं बाहिर जान उद्देलीत नगरि हवाइ नीतिमा परिमार्जन गर्न नाट्टा लुम्बिनीले सुझाब दिएको छ। त्रिभुवन अन्तर्राष्ट्रिय विमानस्थल दिन प्रतिदिन साँघुरो बन्दै गएको भन्दै त्यहाँको एयर ट्राफिक समस्या हवाइ नीति मार्फत सम्बोधन हुनुपर्ने निर्णयमा उल्लेख छ। त्यसका लागि छिमेकी चिन, बौद्धमार्गी मुलुक र श्रमिक गन्तव्यका मुलुकका न्यारोबडीका बजेट एयरलाइन्सलाई भैरहवा र पोखरा बेस गराउनुपर्ने सुझाब दिइएको नाट्टा लुम्बिनीकी महासचिव सीता बस्यालले जानकारी दिइन। त्यस्तै प्रोत्साहन सुविधासहित प्याकेज घोषणा गरि सबै आन्तरिक एयरलाईन्सलाई कम्तीमा एउटा जहाज निश्चित अवधिको लागि अन्तरप्रदेश हवाइ कनेक्टीभिटी उडानको व्यवस्था गर्नुपर्ने, गौतम बुद्ध अन्तर्राष्ट्रिय विमान स्थल प्रयोगकर्ताको लागि बस तथा होटल सहुलियतको घोषणा गर्न आग्रह गरिएको छ।
लुम्बिनी प्रदेश पर्यटन परिषद सदस्य माधव नेपालको प्रमुख आथित्यतामा बुटवलको फूलबारीमा भएको प्लानिङ वर्कसप तथा फेलोसिप कार्यक्रममा नाट्टा लुम्बिनीका पूर्व अध्यक्ष सागर अधिकारी, निवर्तमान अध्यक्ष रचना पन्त, करिब ५० जना ट्राभल व्यवसायीको सहभागीता रहेको महासचिव बस्यालले जानकारी दिइन्।
