बुटवल -बुटवल १५ ढवाहमा रहेको वेष्ट्रन मेघा कलेजमा संस्कृतिक प्रदर्शन तथा स्वागत कार्यक्रम भएको छ। कार्यक्रममा विएचएम प्रथम सेमेष्टरका विद्यार्थीलाई स्वागत गरिएको थियो। सो अवसरमा विद्यार्थीहरुले सांस्कृतिक प्रस्तुतीहरु प्रदर्शन गरेका थिए। आरम्भ रिसोर्टमा गरिएको कार्यक्रममा परम्परागत भाडाकुडा, चुलो, ढकिया, हलो जुवा लगायतका सामाग्री राखिएको थियो।
त्यस्तै विद्यार्थीहरुले परम्परागत पोशाक लगाएर डोको, जाँतो, ठेकामा मोही पारेको लगायतका परम्परागत गतिविधिहरु प्रस्तुत गरेका थिए। यस्तै मायादवी र बौद्ध स्तुपाको प्रतिक पनि प्रदर्शनमा राखिएको थियो। कार्यक्रमका प्रमुख अतिथी महानायक राजेश हमालले परम्परागत सामाग्रीहरुको अवलोकन गरेका थिए। कार्यक्रममा विद्यार्थीहरु नाचगान प्रस्तुत गरेका थिए। महानायक हमाल पनि केहीबेर विद्यार्थीहरुसँग नृत्य गरेका थिए। वेष्ट्रन मेघा कलेजमा बीएचएमको पहिलो सेमेष्टरमा सय भन्दा बढि विद्यार्थी अध्यनरत छन् ।
कार्यक्रममा नेपाली चलचित्रका महानायक हमालले पछिल्लो समयमा युवाहरु रोजगारी या शिक्षाका लागि विदेश पलायन भईरहेको भन्दै जनशक्तिलाई रोक्नको लागि सीपसहितका शैक्षिक कार्यक्रम अपरिहार्य रहेको भनाई राखे ।
उनले वेस्टर्न मेगा कलेजले सीप सहितको शैक्षिक जनशक्ति उत्पादनमा पुर्याएको योगदानको प्रशंसा गर्दै यसरी उत्पादन भएका जनशक्तिलाई स्वदेशमै प्रयाप्त रोजगारी दिन सक्नेगरी औद्योगिक तथा व्यवसायिक प्रतिष्ठान स्थापना हुनुपर्ने बताए।
बुटवल उपमहानगरपालिकाका प्रवक्ता तथा वडा नं. १५ का अध्यक्ष शिव रानाले आरम्भ रिसोर्ट र वेस्टर्न मेगा कलेजको स्थापनाले त्यस क्षेत्रको पहिचान नै बदलेको बताउँदै त्यस होटलले दिने हस्पिटालिटि र कलेजले दिने सीप सहितको शिक्षाले उत्पादित जनशक्तिको व्यवस्थापनमा कुनै समस्या नदेखिएको उल्लेख गरे।
वेस्टर्न मेगा कलेजका अध्यक्ष मेघराज पन्थले कलेजले सीप सहितको शिक्षालाई प्राथमिकता दिएको बताउँदै उत्पादित जनशक्ति खाली बस्नुपर्ने अवस्था नरहेको जानकारी दिए। कलेजका प्रिन्सीपल अधिवक्ता किशु शर्माले विद्यार्थीलाई पाठ्यक्रम बाहेक पनि दक्ष जनशक्ति उत्पादनका लागि रचनात्मक ज्ञान र सीपको विकास गर्नेगरी अतिरिक्त कार्यक्रमहरु सञ्चालन भइरहेको बताए।
वि.एच.एम. तेस्रो वर्षका विद्यार्थी सुजन पोखरेलको अध्यक्षतामा भएको कार्यक्रममा कलेजकी कर्मचारी सविता अधिकारी, विद्यार्थी सुस्मा गुरुङ लगायतले आअफ्ना भनाइ राखेका थिए।
