बैकक घुम्न जाने क्रम बढ्यो

भैरहवा-पछिल्लो समय भैरहवा हुँदै थाइल्याण्ड ओहोदोहोर गर्ने बढेका छन्। प्रत्येक सोमबार थाई एयर एशियाको जहाजले बैंकक भैरहवा बैंकक उडान गर्दै आएको छ। कात्तिकबाट उडान सुरु गरेको एयर एसियाले मौसमका कारण केही समय उडान रोकेर माघबाट पुन उडान सुरु गरेको थियो। पुन उडान सुरु गरेपछि भैरहवाबाट थाइल्याण्ड आउने जानेहरुको चहलपहल बढेको छ।

सोमबार मात्र १७२ जना भैरहवाबाट थाइल्याण्ड उडेका छन्। थाइल्यण्डबाट आएका ९४ जना भैरहवा झरेका छन्। यस अघि जाने यात्रु भएपनि थाइल्याण्डबाट आउने यात्रु एयर एसियाले पाएको थिएन। अघिल्लो सोमबार १६३ जना थाइल्याण्ड प्रस्थान गरेका थिए। जम्मा ११ जना यात्रु भैरहवा आएका थिए। तर यो पटक प्रस्थान गर्नेसँगै बैंककबाट आएर भैरहवा अवतरण गर्ने यात्रु पनि ह्वात्तै बढेका हुन्।

विशेष गरेर थाइल्याण्ड घुम्न जानेहरु बढेका छन्। शुभयात्रा होलीडेज मार्फत फेबुररी १० तारिखमा थाइल्याण्ड गएकाहरु मध्ये १७ जना यो सोमबार फर्किएका हुन्। एभरेष्ट वाथ फिटिङ इन्डस्ट्रिजबाट थाइल्याण्ड घुम्न गएका तिलोत्तमा ड्राइभरटोलका मनिल भट्टराईले भ्रमण निकै रमाइलो भएको सुनाए। ‘हाम्रो ७ रात ८ दिनको थाइल्याण्ड बसाई एकदम रमाइलो भयो। त्यहाँको विकास हेरेर आयौं।’ उनले भने ‘काठमाडौं धेरै सहज तरिकाले गएर आयौं। यहाँबाट अन्तर्राष्ट्रिय उडान भएकाले हामीलाई धेरै सजिलो भयो।’ थाइल्याण्डमा रहेकाहरुलाई पनि लुम्बिनी आउने चाहाना राखेको र सिधा उडानले पर्यटकहरु बढ्ने भट्टराईले आशा व्यक्त गरे।

एभरेष्ट वाथ फिटिङका अध्यक्ष घनश्याम तिवारी तेस्रो पटक थाइल्याण्ड घुम्न गएका हुन्। ‘प्रत्येक वर्ष हाम्रा ५० लाख बढिको विक्रि गर्ने डिलरहरुलाई थाइल्याण्ड घुमाउन लैजान्छौं। यो पटक भैरहवाबाट लैजान पायौं।’ उनले भने ‘भैरहवाबाट हामीलाई जान निकै सहज भयो। नेपालले पनि ट्राभल प्याकेजहरु बनाएर थाइल्याण्डका पर्यटकहरुलाई आकर्षित गर्नुपर्छ।’

भ्रमणको व्यवस्थापन शुभयात्रा होलिडेजले गरेको हो। होलिडेजका सञ्चालक गणेश भट्टराईले भैरहवाबाट यात्रा गराउन पाउँदा खुशी लागेको सुनाए। ‘आफ्ना गाउँ ठाउँका व्यापारी साथीहरुलाई भ्रमणको व्यवस्था गर्दा म आँफूलाई ट्राभल व्यवसायी भएको महसुस गरेको छु।’ उनले भने ‘काठमाडौँ एयरपोर्टबाट ५ वर्षदेखी भ्रमण गराइरहेको थिएँ। गौतमबुद्ध विमानस्थलबाट पहिलो पटक हो। अब धेरै भन्दा धेरैलाई भ्रमणको व्यवस्थापन गराउन पाइन्छ भन्ने आशा छ।’ भट्राईले भैरहवाबाट उडान निरन्तरता भएमा थाइ एयर एसिया मार्फत बैंकक ओहोर दोहोर बढ्ने बताए।