टेक्सास-अमेरिकाको टेक्सास राज्यले मार्च १३ लाई लुम्बिनी वकालत दिवसको रुपमा मनाउने भएको छ। टेक्सास भ्रमणमा रहेका बुद्ध परिपथका प्रतिनिधिहरुको सम्मानमा टेक्सास स्टेट क्यापिटलले दिवस मनाउने प्रस्ताव पारित गरेको हो।

टेक्सासमा रहेका संघ संस्था नेपाली समुदाय, युलेश सिटीका मेयर टिका पौडेल, बुद्ध परिपथको प्रचारमा लागेका सामाजिक अभियान्ता डा. प्रभात दिक्षीत, एनआरएनएका अमेरिकाका अध्यक्ष डा अर्जुन बन्जाडेको, उपाध्यक्ष नेत्रप्रसाद पाण्डे लगायतको पहल र सहजीकरणमा टेक्सास राज्यको संसदले बुद्ध डे मार्च मनाउने प्रस्ताव पारित भएको हो। बुद्ध परिपथको प्रवद्र्धन गर्न केही वर्षअघि देखीको प्रयास सफल भएको बुद्ध परिपथका पालिकाहरुका समन्वयकर्ता तुल्सीराम लामिछानेले बताए। उनले बुद्धपरिपथ, लुम्बिनी प्रदेश र नेपालको पर्यटनको लागि यो ऐतिहासिक दिन भएको उल्लेख गरे।

कार्यक्रममा देवदह नगरपालिकाका प्रमुख धु्रब, खरेल, रामग्राम नगरपालिकाका मेयर धनपत यादव, कपिलबस्तु नगरपालिकाका मेयर सुदीप पौडेल, तिलोत्तमा नगरपालिकाका प्रमुख प्रशासकिय अधिकृत नारायण अर्याल, नेपाल सरकारका उपसचिव रामप्रसाद ज्ञवाली, लुम्बिनी संस्कृतिक नगरपालिकाका लेखा अधिकृत रामचन्द्र अर्याल र समन्वय कर्ता तुल्सीराम लामिछाने सहभागी थिए।

त्यसैगरि टेक्ससको तर्फबाट एनआरएनएका अमेरिका उपाध्यक्ष नेत्रप्रसाद पाण्डे, सामाजिक अभियान्ता डा. प्रभात दिक्षित, नेजा अमेरिकाका अध्यक्ष सुरज भण्डारी, एनआरएनएका सविन्द्र थापा, ग्रेटर नेपाल अस्टिन सोसाइटीका अध्यक्ष विदुर खतिवडा र रासस युएसएका प्रतिनिधि शंकर थापाको सहभागीता थियो।