भैरहवा-काठमाडौंको त्रिभुवन अन्तर्राष्ट्रिय विमानस्थलको विकल्पको रुपमा भैरहवामा र पोखरामा अन्तर्राष्ट्रिय विमानस्थल निर्माण भए। २०७९ साल जेठ २ गते भैरहवाको गौतम बुद्ध अन्तर्राष्ट्रिय विमानस्थलको उद्घाटन भएको हो। त्यसको साढे ७ महिना पछि २०७९ साल पुस १७ गते पोखरा अन्तराष्ट्रिय विमानस्थलको उद्घाटन भयो।
उद्घाटन भएको लामो समयसम्म दुबै ठाउँबाट नियमित अन्तर्राष्ट्रिय उडान हुन सकेको थिएन। उद्घाटन सँगै भैरहवामा जजिरा एयरलाइन्सले उडान थालेको भएपनि उसले नियमितता दिएन। पोखरामा दुई वर्षको विचमा ८ वटा मात्र चार्टर उडान भयो।
गत नोभेम्बरबाट भने गौतम बुद्ध अन्तर्राष्ट्रिय विमानस्थलमा चहलपहल बढ्यो। जजिरा, फ्लाइ दुबइ, थाइ एयर एशिया र कतार एयरलाइन्सले नियमित उडान गर्न थाले। अहिले कतार बाहेक बाँकी ३ एयरलाइन्सले भैरहवामा उडान गरिरहेका छन्।
पोखरामा भने मंगलबारबाट पहिलो व्यवसायीक उडान सुरु भएको छ। पोखरा पर्यटन परिषद्को नेतृत्वमा पोखरा महानगरपालिका, नेपालस्थित चिनियाँ राजदुतावास, सिचुवान एअरलाईन्स र नेपालस्थित चाइनीज एसोसिएसनसँगको सहकार्यमा पहिलो पटक व्यवसायिक चाटर्ड उडान सुरु भएको हो। पहिलो दिन १२८ यात्रु चिनबाट पोखरा आएका छन्। पोखराबाट १२७ जना चिन प्रस्थान गरेका छन्।
पोखरा महानगरपालिकाका मेयर धनराज आचार्यको नेतृत्वमा पर्यटन व्यवसायीहरु चिन भ्रमणमा गएका हुन्। सुरुमा व्यवसायीक पहलबाट पोखरमा केही चार्टर उडान हुने छ। त्यसपछि उडानले निरन्तरता पाउने आशा गरिएको छ। हिमालयन एयरलाइन्सले पनि छिट्टै पोखराबाट नियमित अन्तर्राष्ट्रिय उडान थाल्दैछ। यही चैत्र १८ गतेबाट हिमालयनले पोखरा ल्हासा उडान गर्न लागेको हो। दुई गन्तव्यमा अन्तराष्ट्रिय उडान हुने भएपछि पोखरामा उत्साह छाएको छ।
अन्तर्राष्ट्रिय उडानले पोखरा उत्साहित भइरहँदा भैरहवामा भने अन्तर्राष्ट्रिय उडानले निरन्तरता पाउने हो कि होइन भन्ने अनिश्चित छ। अहिले उडान गरिरहेका जजिरा, फ्लाई दुबई र थाइ एयर एसियाको उडान तालिका यही मार्च सम्म मात्र छ। अप्रिलको उडानको लागि यी एयरलाइन्सहरुले टिकट खोलेका छैनन्। उडानको लागि नागरिक उड्यन प्राधिकरणबाट पनि अझै अनुमती समेत लिएका छैनन्।
अन्तर्राष्ट्रिय विमानस्थललाई आधार मानेर रुपन्देहीमा निजी क्षेत्रमा अर्बौ लगानी भएको छ। लामो प्रतिक्षापछि भैरहवामा छाएको उत्साह कतै निराशामा परिणत हुने त होइन भन्ने आसंका व्यक्त भएको छ।
