मार्चमा मात्र ७०३४ यात्रुले सेवा लिए

भैरहवा – गत मार्च महिनामा भैरहवाको गौतम बुद्ध अन्तराष्ट्रिय विमानस्थल मार्फत कुल ७ हजार ३४ यात्रुले अन्तर्राष्ट्रिय उडान र अवतरण गरेका छन्। मार्चमा कुल १३७ वटा अन्तर्राष्ट्रिय उडान र अवतरण भएको थियो। जसमा विदेशबाट आएका ३ हजार ४२६ जना भैरहवा अवतरण गरेका छन्। ३ हजार ६०८ जना भैरहवाबाट प्रस्थान गरेका छन्।

गत नोभेम्बर महिनादेखी भैरहवामा नियमित अन्तर्राष्ट्रिय उडान हुन थालेको हो। त्यस यता अन्तराष्ट्रिय उडान गर्ने यात्रुको संख्या बढिरहेको थियो। अघिल्ला महिनाहरुको तुलनामा मार्च महिनामा भैरहवाबाट अन्तर्राष्ट्रिय उडान गर्ने यात्रुको संख्या सबै भन्दा बढि रहेको विमानस्थलका महाप्रबन्धक प्रतापबाबु तिवारीले जानकारी दिए।

हप्तामा ३ पटक उडान गरेको जजिराबाट मार्च महिनामा कुल ३ हजार ६०७ जनाले उडान र अवतरण गरेका छन्। जजिराले भैरहवामा एक महिनाको अवधिमा २६ वटा उडान र अवतरण गर्दा कुल ३ हजार ६०७ यात्रुले सेवा लिएका छन्। जसमा कुवेतबाट आएका १ हजार ७०९ जना भैरहवा अवतरण गरेका छन्। १ हजार ८९८ यहाँबाट कुवेत प्रस्थान गरेको महाप्रबन्धक तिवारीले जानकारी दिए।

फ्लाई दुबईको जहाजले एक महिनाको अवधिमा ६० वटा उडान र अवतरण गरेको छ। जसमा कुल २ हजार ३२३ जनाले यात्रा गरेका छन्। १ हजार ४१७ जना भैरहवा अवतरण गरेका छन् भने ९०६ जना भैरहवाबाट दुबई प्रस्थान गरेका हुन्।
थाइ एयर एशियाले मार्च महिनामा ८ वटा उडान र अवतरण गर्दा ९५८ यात्रुले सेवा लिएका छन्। जसमा ३ सय जना भैरहवा आएका छन्। ६५८ जना भैरहवाबाट बैंकक प्रस्थान गरेका छन्।

एयर चाइनाको जहाजले ६ पटक उडान र अवतरण गर्दा १०६ जना भैरहवाबाट प्रस्थान गरेका छन्। नेपाल एयरलाइन्सको जहाज ३४ पटक उडान र अवतरण हुँदा कुनै पनि यात्रुले उडान र अवतरण गरेका छ्रैनन्। हान्स क्यापिटल र एक्सास क्यानडाको जहाज पनि भैरहवा आएको थियो। तर त्यसमा यात्रुहरु भने थिएनन्। गत फेबुररी महिनामा कुल ६ हजार ७७९ यात्रुले उडान र अवतरण गरेका थिए। त्यसअघि जनवरी महिनामा उडान र अवतरण गर्नेको संख्या १ हजार ३६५ रहेको थियो। यात्रुको संख्या बढ्दै जाँदा पनि एयरलाइन्सहरुले उडानलाई निरन्तरता नदिँदा यहाँका व्यवसायीहरु निराश भएका छन्।