पोखरा– पोखरामा भएको ‘ड्रागन बोट रेस’को उपाधि चिनको सिचुवान ड्रागन बोट टिमले हात पारेको छ। शुक्रबारबाट पोखराको फेवातालमा नेपाल–चीन मैत्रीपूर्ण ‘ड्रागन बोट रेस’ सुरु भएको थियो। शनिबार भएको २ सय र ५ सय मिटरको अन्तिम रेसमा सिचुवान ड्रागनले दुबै स्पर्धामा जित निकाल्दै उपाधी जितेको हो।
विजयी भएको सिचुवान ड्रागनले ५ लाख ५० हजार रुपैयाँका दरले दुबै विधामा गरि ११ लाख रुपैयाँ प्राप्त गरेको छ।
प्रतियोगितामा नेपाली ‘नारा ड्रागन बोट टिम’ दुबै स्पर्धामा दोश्रो स्थान प्राप्त गरेको छ । दोस्रो भएको नेपाली टिमले ३ लाख ५० हजार रुपैयाँका दरले ७ लाख रुपैयाँ प्राप्त गरेको छ।
यस्तै चिनको युनान ड्रागन बोट टिम दुवै स्पर्धामा तेश्रो हुँदै प्रति स्पर्धा २ लाखका दरले ४ लाख रुपैयाँ पाएको छ । प्रतियोगितामा नेपाली टिम एनआरसीए उत्कृष्ट ४ मा पर्न सफल भएको थियो । प्रतियोगितामा नेपाल र चीनका ४–४ गरी ८ टिम सहभागी थिए। प्रतियोगितामा भाग लिएका ८ वटै टिमले नगद १–१ लाख रुपैयाँ प्राप्त गरेका छन् ।
विजेता खेलाडीलाई राष्टिय सभा अध्यक्ष गणेश तिमिल्सिना, नेपालका लागि चिनियाँ राजदूत छन् छोङ, पोखरा महानगरका मेयर धनराज आचार्यलगायतले पुरस्कार प्रदान गरेका थिए।