काठमाडौं -नेपाली कांग्रेसका महामन्त्री विश्वप्रकाश शर्माले लोबुचे हिमाल आरोहण गरेका छन्। मंसिर २१ देखि खुम्बु पदयात्रामा रहेका उनी आफ्ना पाँच साथीहरूसहित शुक्रबार ६,१४५ मिटर अग्लो लोबुचे हिमाल आरोहण गरेका हुन्।
आरोहण दलमा शर्मासँगै अनुसन्धानकर्ता प्रकाश लामिछाने, इञ्जिनियर सुभाष अधिकारी, पदम शर्मा तथा कीर्तिमानी आरोहीद्वय मिङ्मा शेर्पा र लाक्पा शेर्पा सहभागी थिए। उनीहरू शुक्रबार बिहान पौने ६ बजे लोबुचे शिखर पुगेको महामन्त्री शर्माको सचिवालयले जनाएको छ। सेभेन समिटले आरोहण सहजीकरण गरेको हो।
जलवायु परिवर्तनले हिमालहरूमा पु¥याएको असरको स्थलगत अध्ययन गरेर संसद, सरकार र संसारको ध्यानाकर्षण गराउनु आरोहणको मुख्य उद्देश्य रहेको सचिवालयले जनाएको छ। पूर्वदेखि पश्चिमसम्मको समग्र हिमाली क्षेत्रका नागरिकले भोग्नुपरेका चुनौतीको थप अध्ययन गरेर समाधानका लागि सबै तहको ध्यानाकर्षण गराउने उद्देश्य पनि लिइएको छ।
आरोहण क्रममा गरिएको स्थलगत अध्ययनका आधारमा सांसद शर्माले संसदको आगामी अधिवेशनमा जलवायु परिवर्तनले हिमाली क्षेत्रमा पारेको असरबारे विवरण पेस गर्ने छन्। यसका लागि उनले स्थानीयवासीसँग संवाद गरेका थिए।
