बुटवल– अग्रेजी नया वर्ष २०२६को अवसरमा आयोजना गरिएको बुटवल सडक खाना महोत्सव सम्पन्न भएको छ। होटल तथा रेष्टुरेन्ट ब्यवसायी संघ रुपन्देहीको आयोजना र बुटवल उपमहानगरपालिकाको संरक्षकत्वमा भएको ३ दिने महोत्सव लक्ष्य अनुसार २ करोड कारोबार गरि सम्पन्न भएको हो।
महोत्सवको समापन गर्दै बुटवल उपमहानगरपालिकाका उपप्रमुख सावित्रादेवि अर्यालले कालिकापथलाई रात्रीकालिन बजारको रुपमा विकास गर्न जरुरी रहेको कुरा पुष्टि भएको बताइन्। पर्यटन नै अब आर्थिक समृध्दिको पाटो भएको भन्दै उनले पर्यटकिय स्थलको विकास र प्रचारप्रसारमा स्थानिय सरकार सहकार्य गर्न तयार रहेको जानकारी दिइन्।
आयोजक होटल तथा रेष्टुरेन्ट व्यवासायी संघका अध्यक्ष माधव कुमार खनालले नेपाली मौलिक कला, संस्कृति, स्वाद र पहिचानको सम्मान गर्दै आन्तरिक पर्यटन प्रवद्र्धन, विकास र रोजगारी सृजना गर्न यस्ता महोत्सव सफल हुने भन्दै कार्यक्रमलाई निरन्तरता दिने बताए। पर्यटन गन्तव्यको बजारीकरणमा यस्ता मेलामहोत्सव प्रभावकारी हुने गरि सरकारबाट योजनाहरु बनाउन समेत सुझाव दिए।
महोत्सवमा राखिएका स्टलहरुमध्ये साजसज्जा, संस्कृति पहिचानका खानाका परिकारका हिसाबबाट उचडिहवा स्वालम्बन महिला समुह प्रथम, समयवजि भ्वय बुटवल वडा नं. ३ दोस्रो तथा अर्घाखार्ची क्याटरिङ एण्ड पार्टी प्यालेस तेस्रो भएको संघका प्रमुख सल्लाहकार तथा अनुगमन समितिका संयोजक माधव प्रसाद नेपालले घोषणा गरे। यसैगरि न्यू स्वाद गोलपार्क, मगरी खाजाघर र सैनामैना थारु परिकार सान्त्वना एवं सामाजिक उत्तरदायित्वमा उत्कृष्ट योगदानको सम्मानबाट पहिलो पाईला नेपाल र मारवाडी महिला मंच बुटवललाई सम्मानित गरिएको संघका निवर्तमान अध्यक्ष भण्डारीले जानकारी दिए।
तीन दिनसम्म चलेको महोत्सवमा दैनिक राष्ट्रिय कलाकारहरुको प्रस्तुतीमा दर्शकहरु झुमेको संघका पर्यटन उपाध्यक्ष रोमाकान्त पाण्डेले बताए। महोत्सवमा प्रकाश सपुत, पुष्कल शर्मा, शान्तिरानी परियार, खुमन अधिकारी, शिलु भट्टराई, नारायण विपी परियार, अनु राना लगायत राष्ट्रिय र स्थानिय गायक तथा विष्णुजी पाण्डे माईलाबा, पुर्खेबा, उज्जवल गिरीसहितका हास्यकलाकारहरुको प्रस्तुतीहरु रहेको संघका महासचिव केशवराज कंडेलले बताए।