बुद्धस्थलहरुको पर्यटन प्रवर्द्धनमा युलेश सिटीले निरन्तर सहकार्य गर्ने

बुटवल– बुद्ध परिपथ अन्तर्गतका पालिका र संयुक्त राज्य अमेरिकाको टेक्सास राज्य अन्तर्गत युलेश सिटीका पदाधिकारीहरुबीच समन्वय बैठक सम्पन्न भएको छ। अमेरिकाको भ्रमणमा ५ पालिकाका पदाधिकारीले युलेशका जनप्रतिनिधिबीच भएको छलफलले बुद्धपरिपथसँगै नेपालको पर्यटन प्रवद्र्धनमा सहकार्य गर्ने निर्णय गरेका छन्।

युलेश सिटीले आफ्नो नगरमा नेपाली समुदायबाट स्थापित पशुपतिनाथ मन्दिर, बौद्ध स्तुपा तथा विहारहरुमा निरन्तर सहयोग तथा सहकार्य गर्ने जनाएको छ। समन्वय बैठकमा रुपन्देहीको देवदह नगरपालिकाका प्रमुख ध्रुवप्रसाद खरेल, कपिलबस्तु नगरपालिकाका मेयर सुदीप पौडेल, रामग्राम नगरपालिकाका मेयर धनपत यादव, तिलोत्तमा नगरपालिका प्रमुख प्रशासकिय अधिकृत नारायणप्रसाद अर्याल, नेपाल सरकारका उपसचिव रामप्रसाद ज्ञवाली, लुम्बिनी सांस्कृतिक नगरपालिकाका लेखा अधिकृत रामचन्द्र अर्याल र बुद्धपरिपथका नगरपालिका समन्वय कर्ता तुल्सीराम लामिछाने सहभागी थिए।

युलेस सिटीको तर्फबाट मेयर लिन्दा मार्टिन, उपमेयर टीका पौडेल, युलेस सिटी म्यानेजर चिरिस बार्कर, असिष्टेन्ट सिटी मेनेजर स्टेभन विएरा, लोभान्स बोजान्ट, इन्द्रेणी कल्चर एशोसिएन टेक्सासका अध्यक्ष नेत्रप्रसाद पाण्डे, युलेस सिटीका आइटी जिवन घिमिरेको उपस्थिती थियो।

छलफलमा युलेश सिटी र बुद्धपरिपथका पालिकाबीच आगामी दिनमा गर्ने सहकार्यका साथै आ आफ्ना पालिकाका अनुभव आदनप्रदान गरिएको बुद्ध परिपथ पालिकाका समन्वय प्रमुख तुल्सीराम लामिछानेले जानकारी दिए।